ڈربی: قومی ٹیم کے ہیڈ کوچ نے بیٹنگ کوچ یونس خان اور پی سی بی کے درمیان تنازعے پر بیان دینے سے گریز کرتے ہوئے کہا کہ یونس خان کا تجربہ اہم تھا کھلاڑیوں کے لیے ان کی کمی محسوس کی جائے گی۔
تفصیلات کے مطابق ڈربی سے ورچوئل پریس کانفرنس میں ہیڈ کوچ مصباح الحق نے کہا کہ یونس خان کی کوچنگ چھوڑنے کا معاملہ ان کا اور پی سی بی کا ہے، میں یونس خان کے حوالے سے کمنٹ نہیں کرنا چاہتا، یونس خان کا تجربہ اہم تھا کھلاڑیوں کے لیے ان کی کمی محسوس کی جائے گی۔
مصباح الحق نے کہا کہ جو بھی کوچنگ اسٹاف موجود ہے، اسی سے کھلاڑیوں کا مدد کرنا ہدف ہے مگر یہ حقیقت ہے کہ یونس خان کے تجربے سے بلے بازوں کو فائدہ پہنچ رہا تھا۔
ورچوئل کانفرنس میں ہیڈ کوچ کا کہنا تھا کہ کسی کرکٹرز کی فارم نہ مستقل رہتی ہے نا مستقل خراب رہتی ہے، پی ایس ایل سیزن میں خراب کارکردگی کا مظاہرہ کرنے والے قومی اسکواڈ میں شامل کھلاڑیوں کا دفاع کرتے ہوئے مصباح الحق نے کہا کہ ایونٹ میں کارکردگی نہ دکھانے والے انٹرنیشنل کرکٹ میں پرفارم کرینگے۔
یہ بھی پڑھیں: یونس خان اور حسن علی کے درمیان تلخ کلامی کیوں ہوئی؟
مصباح الحق نے اعتراف کیا کہ قومی ٹیم میں نمبر پانچ اور نمبر چھ بیٹنگ کا اہم مسئلہ ہے، صہیب مقصود کے آنے سے مڈل آرڈر کا مسئلہ حل ہوسکتا ہے۔
اوپننگ سے متعلق سوال پر مصباح الحق کا کہنا تھا کہ اوپننگ جوڑی کا ابھی تک فیصلہ نہیں ہوسکا، میچز سے پہلے ہی فیصلہ کرینگے کونسی اوپنگ جوڑی ہوگی۔
فاسٹ بولر شاہنواز دھانی کو پاکستان کا مستقبل قرار دیتے ہوئے مصباح الحق نے کہا کہ کارکردگی کی بنیاد پر وہ مستقل میں وائٹ بال کرکٹ میں جگہ بناسکتا ہے۔
