لاہور : گلشن اقبال سے لاپتہ ہونے والے عبداللہ نامی نوجوان کی گمشدگی کا معاملہ تاحال حل نہ ہوسکا، اہل خانہ کا کہنا ہے پولیس لاش کو تلاش کرنے میں دلچسپی نہیں لے رہی، اعلی حکام نوٹس لیں۔
تفصیلات کے مطابق لاہور کے علاقے گلشن اقبال نشتر بلاک کا رہائشی عبداللہ گزشتہ ماہ کی25 تاریخ کی رات اپنے دوست عمار کے ساتھ ایک پارٹی میں شرکت کا کہہ کر گیا تھا۔
واپس گھر نہ لوٹنے پر پولیس سے رابطہ کیا گیا تو9روز بعد اغوا کا مقدمہ درج کیا گیا، عبداللہ کے اغوا کا مقدمہ والدہ کی مدعیت میں اس کے دوست عمار کے خلاف درج کیا گیا تھا۔
پولیس نے مقدمہ درج کرکے نامزد ملزم عمار اور اس کے دو ساتھیوں کو حراست میں لیا، پولیس نے روایتی انداز میں تفتیش کی تو ملزمان نے تمام راز افشا کردیئے۔
ملزمان نے انکشاف کیا کہ عبداللہ نشے کی زیادتی سے دم توڑ گیا تھا تو ہم نے پکرے جانے کے ڈر سے لاش جمبر نہر میں پھینک دی، ملزمان کے بیان پر پولیس نے جمبرنہر میں متوفی لاش تلاش کی جو نہیں ملی۔
اس حوالے سے عبداللہ کے اہل خانہ نے پولیس پر الزام عائد کیا ہے کہ 10دن ہوگئے عبداللہ کی لاش کو پولیس نے تلاش نہیں کیا، انہوں نے اپیل کی ہے کہ اعلیٰ پولیس افسران اور حکومت مشکل گھڑی میں ہماراساتھ دے۔
