بلغراد : سربیا میں جاری ایک فٹبال میچ کے دوران بوسنیا کے سابق فٹبالر میدان میں اچانک گر کر جان کی بازی ہار گئے، انہوں نے کچھ دیر قبل مچھلی کھاتے ہوئے شکوک وشبہات کا اظہار کیا تھا۔
سربیا میں جاری ایک فٹبال میچ کے دوران افسوسناک واقعہ پیش آیا ہے جب بوسنیا کے سابق بین الاقوامی فٹبالر اور کوچ ملاڈن زیزووک دورانِ کھیل دل کا دورہ پڑنے سے چل بسے۔
یہ اندوہناک واقعہ اتوار کی شام سربین لیگ کے میچ میں پیش آیا، جب ان کی ٹیم ریڈنِسکی 1923 کا مقابلہ ملادوسٹ سے جاری تھا۔
ٹی وی فوٹیج میں دیکھا گیا کہ ملاڈن زیزووک میچ کے چوتھے منٹ میں اپنی ٹیم کو پُرجوش انداز میں ہدایات دے رہے تھے، اس وقت ان کی ٹیم ایک صفر سے آگے تھی۔ تاہم، کھیل کے 22ویں منٹ میں وہ اچانک سائیڈ لائن پر گر پڑے، جس کے بعد فوری طبی امداد فراہم کی گئی۔
انہیں فوری طور پر ایمبولینس کے ذریعے اسپتال منتقل کیا گیا مگر بدقسمتی سے وہ راستے ہی میں دم توڑ گئے، یہ خبر جیسے ہی میدان میں پہنچی میچ فوراً روک دیا گیا۔
کھلاڑیوں پر سکتہ طاری ہوگیا، کئی کھلاڑی زمین پر گر کر رونے لگے جبکہ بعض نے گھٹنے ٹیک کر خاموشی سے دعا کی۔
ان کی ٹیم کے ایک کھلاڑی مہمد کوسک نے انکشاف کیا کہ کوچ زیزووک نے میچ سے چند گھنٹے قبل مچھلی کے کھانے کی شکایت کی تھی۔ وہ کہہ رہے تھے کہ مچھلی ٹھیک نہیں ہے، آئندہ نہیں کھاؤں گا۔ وارم اپ کے دوران سب نارمل تھا، کھیل شروع ہوا اور پھر اچانک یہ سب ہو گیا کہ ہم سب سکتے میں ہیں۔”
