The news is by your side.

Advertisement

ہماری سفارتی کامیابی پر مودی دباؤ کا شکار ہے: علی امین گنڈاپور

اسلام آباد: وفاقی وزیر امور کشمیر علی امین گنڈاپور نے کہا ہے کہ سفارتی سطح پر ہماری کامیابی پر مودی دباؤ کا شکار ہے، پاکستان کے دفاع کے لیے ہم ہر حد تک جائیں گے۔

تفصیلات کے مطابق اے آر وائی نیوز کے پروگرام آف دی ریکارڈ میں گفتگو کرتے ہوئے علی امین گنڈاپور نے کہا کہ جنگ مسئلوں کا حل نہیں ہے، جنگ کے بعد کے مسائل کو دیکھنا پڑتا ہے۔

انھوں نے کہا کہ اقوام متحدہ کی سلامتی کونسل نے مسئلہ کشمیر کو اہم سمجھ کر اجلاس بلا لیا ہے، عوام کی آواز اٹھنے پر قیادت اقدام پر مجبور ہوتی ہے، دنیا بھر میں ہونے والے احتجاج کو اقوام متحدہ نے بھی مانا ہے۔

علی امین کا کہنا تھا کہ مسلمانوں نے ہمیشہ اسلحے سے نہیں جذبے سے جنگیں لڑیں، بھارت کوئی سپر پاور نہیں ہے، خوف کے مارے بھارت کشمیریوں کو گھروں سے نکلنے نہیں دے رہا۔

وفاقی وزیر نے کہا کہ مودی کے اقدامات سے شملہ معاہدہ تقریباً ختم ہو گیا ہے، ہم نے پیغام دیا ہے کہ مسئلہ کشمیر پر کوئی سمجھوتا نہیں ہوگا، پہلے ہم تنہائی کا شکار تھے، اب حالات بدل رہے ہیں، دنیا کو پیغام دیا ہے کہ ہم ایٹمی طاقت ہیں۔

انھوں نے مزید کہا کہ عمران خان کے آنے پر عالمی سطح پر رسپانس آ رہا ہے، سفارتی سطح پر کامیابی پر مودی دباؤ کا شکار ہے، انشاء اللہ اب وہ وقت آ گیا ہے کہ کشمیر آزاد ہو کر رہے گا، عمران خان کشمیر کو فلسطین نہیں بننے دیں گے۔

Comments

comments

یہ بھی پڑھیں