دوحا: بھارتی وزیراعظم نریندر مودی پانچ ملکی دورے میں افغانستان کے بعد قطر پہنچ گئے ہیں،دوحا ایئرپورٹ پر اُن کا استقبال قطر کے وزیر اعظم نے کیا۔
تفصیلات کے مطابق ہندوستان کے وزیرِ اعظم نریندر مودی اپنے ’’پانچ ممالک کے دورے‘‘ کے اگلے مرحلے میں افغانستان کا دورہ مکمل کر کے قطر پہنچ گئے ہیں،جہاں وہ آج دوحا میں قطر کے وزیراعظم شیخ عبداللہ بن ناصر بن خلیفہ الثانی سے ملاقات کریں گے۔
ذرائع کے مطابق بھارتی وزیر اعظم مودی دوحا ائیرپورٹ سے قطر کے وزیر اعظم کے ہمراہ روانہ ہو گئے،جہاں مودی قطر کے وزیرِ اعظم کے ساتھ عشائیہ کریں گےاورایک ملاقات میں دونوں ملکوں کے درمیان جاری معاہدوں پر دستخط کریں گے۔
بعد ازاں بھارتی وزیر اعظم مودی نے دوحا میں بھارتی ورکرز کے کیمپ کا دورہ کیا اور اُن کے مسائل سن کر انہیں حل کرانے کی یقین دہانی کرائی۔
بھارتی وزیراعظم نریندر مودی اپنے پانچ ملکی دورے میں افغانستان اور قطر کے بعد سوئٹزر لینڈ ، امریکا اور میکسیکو کا بھی دورہ کریں گے۔
خطہ میں تیزی سے پیدا ہوتی سیاسی تبدیلیوں،پاک چائنا اقتصادی راہداری، پاکستان میں را ایجنٹ کی گرفتاری اور دہشت گردی کے ناقابلِ تردید شواہد کے بعد بھارت اپنی کمزور ہوتی پوزیشن کو سہارا دینے کی کوششیں کر رہاہے، مودی کے پانچ ملکی دورے کو اسی سلسلے کی کڑی کہا جارہا ہے۔