نئی دہلی: وزیر اعظم عمران خان کا کرونا ٹیسٹ مثبت آنے پر بھارتی وزیر اعظم مودی نے ٹوئٹ کر دیا ہے۔
تفصیلات کے مطابق بھارتی وزیر اعظم نریندر مودی نے ایک ٹوئٹ میں وزیر اعظم پاکستان کے لیے دعا اور نیک خواہشات کا اظہار کیا ہے۔
مودی نے ٹوئٹ کیا کہ وہ وزیر اعظم عمران خان کی جلد صحت یابی کے لیے دعاگو ہیں۔
واضح رہے کہ آج وزیر اعظم پاکستان عمران خان کا کرونا ٹیسٹ مثبت آ گیا ہے، جس کے بعد انھوں نے خود کو گھر میں قرنطینہ کر لیا ہے۔
یاد رہے کہ گزشتہ برس جون میں وزیر اعظم عمران خان نے بھارتی وزیر اعظم نریندر مودی کو کامیاب احساس کیش پروگرام شیئر کرنے کی پیش کش کی تھی۔
Best wishes to Prime Minister @ImranKhanPTI for a speedy recovery from COVID-19.
— Narendra Modi (@narendramodi) March 20, 2021
سماجی رابطے کی ویب سائٹ ٹوئٹر پر اپنے پیغام میں عمران خان نے کہا تھا لاک ڈاؤن سے بھارت میں 34 فی صدگھرانے شدید متاثر ہیں، اور ان کی آمدنی کم ہوگئی ہے، بھارت میں ہر 3 میں سے ایک شہری ہفتے سے زیادہ اپنا خرچ نہیں اٹھا سکتا۔
وزیر اعظم نے کہا میں مدد کی پیش کش کرنے اور اپنا کامیاب احساس کیش پروگرام بھارت سے شیئر کرنے کے لیے تیار ہوں، جس کی شفافیت کی وجہ سے بین الاقوامی سطح پر تعریف کی جاتی ہے۔
خیال رہے کہ بھارت کرونا وائرس سے متاثر دنیا کے 219 ممالک میں سے کیسز کی تعداد کے لحاظ سے تیسرے نمبر پر ہے، جہاں مجموعی کیسز ایک کروڑ سے تجاوز کر چکے ہیں، جب کہ اموات 1 لاکھ 59 ہزار 700 سے زیادہ ہیں۔
