تازہ ترین

مودی کو یوکرین کے دورے کی دعوت دی جائے گی

نئی دہلی: بھارتی وزیر اعظم نریندر مودی کو یوکرین کے دورے کی دعوت دی جائے گی۔

غیر ملکی میڈیا رپورٹس کے مطابق یوکرینی نائب وزیر خارجہ ایمن زھپارووا اتوار سے بھارت کا دورہ کریں گی، اس دوران وزیر اعظم مودی کو کیف کے دورے کی دعوت کا بھی امکان ہے۔

یوکرین پر روسی حملے کے بعد سے یہ کسی یوکرینی عہدے دار کا پہلا دورہ بھارت ہوگا، زھپارووا کا دورہ بھارت 4 روز پر مشتمل ہے، دورے کا مقصد ہندوستان اور یوکرین کے درمیان دو طرفہ تعلقات اور یوکرین کی موجودہ صورت حال پر تبادلۂ خیال کرنا اور باہمی دل چسپی کے عالمی مسائل کو تلاش کرنا ہے۔

میڈیا رپورٹس کے مطابق یوکرین میں جنگ نے ملک کے توانائی کے بنیادی ڈھانچے کو کافی نقصان پہنچایا ہے، اور نائب وزیر خارجہ سے توقع کی جا رہی ہے کہ وہ اپنے دورے کے دوران بحالی کے لیے انسانی امداد کو ممکن بنائیں گی۔

واضح رہے کہ رواں برس جی 20 بلاک کی صدارت سنبھالنے کے باوجود بھارت نے یوکرین پر حملے کے لیے اپنے سابق اتحادی روس کو مورد الزام ٹھہرانے سے انکار کیا ہے، اور روسی تیل کی خریداری جاری رکھتے ہوئے سفارتی حل تلاش کرنے پر زور دیا ہے۔

Comments

- Advertisement -