لاہور: قومی کرکٹ ٹیم کے تجربہ کار آل راؤنڈر محمد حفیظ نے ماضی کی تلخیاں بھلا کر رمیز راجہ کو پی سی بی چیئرمین بننے پر مبارک باد دے دی۔
تفصیلات کے مطابق قومی ٹیم کے آل راؤنڈر محمد حفیظ نے سماجی رابطے کی ویب سائٹ ٹویٹر پر جاری بیان میں رمیز راجہ کو پاکستان کرکٹ بورڈ (پی سی بی) کا چیئرمین بننے پر مبارک باد دی اور ان کے لیے نیک خواہشات کا اظہار کیا۔
یاد رہے کہ ماضی میں رمیز راجہ اور محمد حفیظ میں کافی تلخیاں رہ چکی ہیں۔
Congratulations @iramizraja as chairman @TheRealPCB . Best wishes
— Mohammad Hafeez (@MHafeez22) September 13, 2021
واضح رہے کہ گزشتہ روز سابق کپتان رمیز راجہ احسان مانی کی جگہ تین سال کے لیے بلا مقابلہ پی سی بی کے 36ویں چیئرمین منتخب ہوگئے ہیں۔
رمیز راجہ ماضی میں بھی پی سی بی کے انتظامی امور میں شامل رہے ہیں، 2000 کے اوائل میں وہ لیفٹیننٹ جنرل (ر) توقیر ضیا کے دور میں بورڈ کے ایڈوائزری کونسل کے رکن تھے۔
رمیز راجہ ڈائریکٹر کرکٹ آپریشنز کے فرائض بھی انجام دے چکے ہیں، یہ عہدہ بعد میں چیف ایگزیکٹو (سی ای او) میں تبدیل ہوگیا تھا، وہ شہریار خان کے دور میں بھی سی ای او رہے تھے۔
خیال رہے کہ گزشتہ روز نومنتخب چیئرمین پی سی بی رمیز راجہ نے ٹی ٹوینٹی ورلڈ کپ کے لیے سابق آسٹریلوی اوپنر میتھیو ہیڈن اور جنوبی افریقہ کے سابق فاسٹ بولر ورنن فلیندر کو قومی ٹیم کا بیٹنگ اور بولنگ کوچ مقرر کیا ہے۔
