بھارت کے تجربہ کار فاسٹ باؤلر محمد شامی نے ٹیم میں شامل نہ کیے جانے پر بھارتی مینجمنٹ کو سخت تنقید کا نشانہ بنایا ہے۔
آئندہ آسٹریلیا کے دورے کے لیے ون ڈے اور ٹی ٹوئنٹی اسکواڈ میں بھاررتی سینئر فاسٹ بولر کو ٹیم کا حصہ نہیں بنایا گیا جس پر محمد شامی ناراض نظر آتے ہیں، اپنی فٹنس کے بارے میں قیاس آرائیوں پر بھی انھوں نے واضح کیا کہ وہ مکمل طور پر میچ کے لیے فٹ تیار ہیں۔
محمد شامی نے بھارتی ٹیم مینجمنٹ پر طنز کرتے ہوئے کہا کہ اگر وہ چار روزہ رانجی ٹرافی میچ کھیلنے کے لیے فٹ ہیں تو انھیں قدرتی طور پر 50 اوورز کی کرکٹ کے لیے بھی فٹ ہونا چاہیے۔
انھوں نے کہا کہ بھارتی ٹیم نے فٹنس کے بارے میں مجھ سے بات نہیں کی، انہیں بتانا میرا کام نہیں ہے، انہیں مجھ سے پوچھنا چاہیے کہ میں فٹ ہوں کہ نہیں۔
محمد شامی کا کہنا تھا کہ اگر میں چار روزہ میچ کھیل سکتا ہوں تو میں ون ڈے کیوں نہیں کھیل سکتا؟ اگر میں فٹ نہ ہوتا تو میں این سی اے میں ہوتا، رانجی ٹرافی کے میچز نہیں کھیل رہا ہوتا۔
کرکٹ ایسوسی ایشن آف بنگال (سی اے بی) کے مطابق محمد شامی کو 2025-26 رانجی ٹرافی سیزن کے لیے بنگال کے اسکواڈ میں شامل کیا گیا ہے، جو کہ 15 اکتوبر سے شروع ہو رہا ہے، جس میں ابھیمانیو ایشوران ٹیم کی قیادت کریں گے۔
خیال رہے کہ چیف سلیکٹر اجیت اگرکار سے جب شامی کی غیر موجودگی کے بارے میں پوچھا گیا تو انھوں نے کہا کہ ان کے بارے میں کوئی نئی اپ ڈیٹ نہیں ہے، فاسٹ بولر نے دلیپ ٹرافی میں مییچز کھیلےہیں لیکن پچھلے دو یا تین سالوں میں انھوں نے زیادہ کرکٹ نہیں کھیلی ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں