شمالی وزیرستان : محسن داوڑ کے قریبی ساتھی ڈاکٹرعالم نے اعتراف کیا ہے کہ چیک پوسٹ پر حملے کے وقت محسن داوڑ مسلح گارڈز کے ساتھ تھا، ڈاکٹرعالم کے اعتراف کی ویڈیو منظرعام پر آگئی۔
تفصیلات کے مطابقشمالی وزیرستان کے علاقہ خرکمر میں محسن داوڑ اور علی وزیر کی قیادت میں فوجی چیک پوسٹ پر حملہ سے سے متعلق بڑا سچ سامنے آگیا۔
محسن داوڑ کے قریبی ساتھی ڈاکٹرعالم نے ایک ویڈیو میں اس بات کاعتراف کیا ہے کہ چیک پوسٹ پر حملے کے وقت محسن داوڑ اپنے مسلح گارڈز کے ساتھ موجود تھا۔
اس بیان کے بعد سوال یہ پیدا ہوتا ہے کہ محسن داوڑ مسلح گارڈز کے ساتھ چیک پوسٹ کیوں آیا اور اس کے کیا مقاصد تھے؟
یاد رہے کہ اس سے قبل علی وزیر کی بھی لوگوں کو حملے پر اکسانے کی ویڈیو سامنے آچکی ہے۔
واضح رہے کہ گزشتہ روز شمالی وزیرستان کے علاقہ خرکمر میں محسن داوڑ اور علی وزیر کی قیادت میں ایک ڈنڈا بردار گروپ نے فوجی چیک پوسٹ پر حملہ کیا, یہ شرپسند عناصر ایک روز قبل گرفتار کیے گئے دہشت گردوں کے سہولت کار کو چھڑانا چاہتے تھے۔
بعد ازاں علی وزیر کو8ساتھیوں سمیت گرفتارکیا گیا جبکہ محسن داوڑ لوگوں کو انسانی ڈھال بنا کر جائے وقوعہ سے فرار ہوگیا تھا۔
ذرائع کے مطابق محسن داوڑ بدستور مذموم عزائم کی تکمیل میں مصروف ہے اور پی ٹی ایم رہنما گلالئی اسماعیل ایف آئی آر کے اندراج کے بعد ملک سے فرار ہونے کی کوششوں میں مصروف ہے۔