لاہور : الیکشن کمیشن نے محسن نقوی کو نگراں وزیراعلیٰ پنجاب نامزد کردیا، وہ کل گورنرہاؤس لاہور میں اپنے عہدے کا حلف اٹھائیں گے۔
تفصیلات کے مطابق نگراں وزیراعلیٰ پنجاب کے تقررکے معاملہ میں بڑی پیشرفت سامنے آئی ہے، الیکشن کمیشن آف پاکستان (ای سی پی) نے محسن نقوی کونگراں وزیر اعلیٰ پنجاب نامزد کردیا ہے۔
محسن نقوی کو نگراں وزیراعلیٰ پنجاب مقرر کرنے کا فیصلہ چیف الیکشن کمشنر کی سربراہی میں ہونے والے اجلاس میں کیا گیا۔ انکو آرٹیکل224 کے تحت مقرر کیا گیا۔
الیکشن کمیشن نے متفقہ فیصلہ دو گھنٹے طویل اجلاس میں کیا، بعد ازاں محسن نقوی کی بطور نگران وزیر اعلیٰ پنجاب تقرری کا نوٹیفکیشن بھی جاری کردیا ہے۔
سابق وزیر اعلیٰ چوہدری پرویز الہٰی کی جانب سے پنجاب اسمبلی تحلیل کیے جانے کے بعد صوبے کے نگران وزیراعلیٰ کے لئے احمد نواز سکھیرا اور نوید اکرم چیمہ کے نام تجویز گئے تھے جبکہ اپوزیشن لیڈر حمزہ شہباز نے احد چیمہ اور محسن نقوی کے نام بھیجے تھے۔
حکومت اور حزب اختلاف کی جانب سے ناموں پر اتفاق نہ ہونے کے باعث مندرجہ بالا نام چیف الیکشن کمشنر کو بھجوا دیئے گئے تھے، جس کا فیصلہ آج کردیا گیا ہے۔
