فیصل آباد : نگراں وزیراعلیٰ پنجاب محسن نقوی کا کہنا ہے کہ تنصیبات کونقصان پہنچانےوالوں کے خلاف فوجی قانون لگے گا، کوئی نئی چیزنہیں ہورہی نہ نئی عدالتیں بنیں گے۔
تفصیلات کے مطابق نگراں وزیراعلیٰ پنجاب محسن نقوی نے کمشنرآفس میں سینئرصحافیوں سے ملاقات میں گفتگو کرتے ہوئے کہا کہ تنصیبات کو نقصان پہنچانے والوں کےخلاف فوجی قانون لگے گا، کوئی نئی چیزنہیں ہورہی نہ نئی عدالتیں بنیں گے۔
نگراں وزیراعلیٰ پنجاب کا کہنا تھا کہ 9مئی کے واقعات میں ملوث لوگوں کا ٹرائل ہوگا اور کسی بےگناہ کاٹرائل ہوگانہ کسی سےزیادتی ہوگی، ملزمان کی نشاندہی کیلئےمؤثرطریقہ کارہے۔
محسن نقوی نے کہا کہ حملہ آوروں کی 3مراحل میں نشاندہی کی جارہی ہے،مجھ پرجانبداری کاالزام غلط ہے، مجھےتنقیدسےکوئی مسئلہ نہیں ہے۔
اس سے قبل نگران وزیراعلیٰ پنجاب محسن نقوی نے 9مئی کےواقعات میں کیپٹن اسفندیارشہید کی تباہ یادگارکی بحالی کاافتتاح کیا ، فیصل آبادانتظامیہ نےکیپٹن اسفندیارشہیدکی یادگارکوبحال کیا۔
وزیراعلیٰ نے کہا تھا کہ 9مئی کوشرپسند وں نےکیپٹن اسفندیارشہیدکی یادگارکونقصان پہنچایا،بےحرمتی کی،شہیدکیپٹن اسفند یار کے والد سے شہید بیٹےکی یادگارکی بےحرمتی پرمعذرت کرتےہیں، ایسےدلخراش واقعات پاکستان کی تاریخ میں کبھی نہیں ہوئے،جوہواوہ تلخ ماضی ہے۔
ان کا کہنا تھا کہ شہید کے والد سے وعدہ ہے اس چوک کو پاکستان کا سب سے بہترین چوک بنائیں گے، 9مئی کو دہشت گردی واقعات کے جو بھی ذمہ دار ہیں انہیں نہیں چھوڑیں گے، گارنٹی دیتا ہو ں کہ کسی بےگناہ کےخلاف کارروائی نہیں ہوگی۔
محسن نقوی نے مزید کہا تھا کہ کوئی نئی عدالتیں نہیں بنائی جارہیں،آرمی کااپناقانون ہے، فوجی تنصیبات پرکوئی حملہ کرتاہےتوآرمی قانون کےمطابق کارروائی ہوتی ہے، لاہور میں جناح ہاؤس اورفیصل آبادمیں آئی ایس آئی کےدفترپرحملہ ہوا، آرمی کاجوقانون کہتاہےاس کے مطابق کارروائی ہوگی۔
