لاہور: نگراں وزیراعلیٰ پنجاب محسن نقوی نے اپنے عہدے کا حلف اٹھالیا۔
تفصیلات کے مطابق تقریب حلف برداری گورنر ہاؤس پنجاب میں ہوئی، تقریب میں سیاسی شخصیات سمیت سول وعسکری حکام نے شرکت کی۔
گورنر پنجاب بلیغ الرحمان نے نگراں وزیراعلیٰ پنجاب محسن نقوی سے حلف لیا۔
اس سے قبل الیکشن کمیشن کی جانب سے نگراں وزیراعلیٰ پنجاب کا نوٹی فیکیشن جاری کیا گیا جس کے بعد گورنر پنجاب بلیغ الرحمان گورنر ہاؤس پہنچے،اس موقع پر گورنر ہاؤس کا اہم اسٹاف وافسران بھی آفس میں موجود تھا۔
ادھر پرویز الہیٰ نے اپنے ٹوئٹ میں کہا کہ الیکشن کمیشن کا متنازع فیصلہ ہراصول اور ضابطےکیخلاف ہے،میرا قریب ترین رشتےدار کیسےنگراں وزیراعلیٰ بن سکتاہے؟، محسن نقوی کے معاملے پر ہم سپریم کورٹ جارہے ہیں۔
حارث سٹیل کیس میں 35 لاکھ روپے کی پلی بارگین کرنے والے شخص سے کیسے انصاف کی توقع کی جا سکتی ہے.میرا قریب ترین رشتے دار کیسے نگران وزیراعلیٰ بن سکتا ہے.الیکشن کمیشن کا متنازعہ فیصلہ ہر اصول اور ضابطے کے خلاف ہے. الیکشن کمیشن کے اس فیصلے کے خلاف ہم سپریم کورٹ جا رہے ہیں.
— Ch Parvez Elahi (@ChParvezElahi) January 22, 2023
دوسری جانب پی ٹی آئی کے مرکزی رہنما فواد چوہدری کا کہنا ہے کہ محسن نقوی کی بطور نگراں وزیر اعلیٰ پنجاب تقرری کو مسترد کرتے ہیں، الیکشن کمیشن نے اپنے فیصلوں سے ثابت کیا کہ وہ حکومت کی بی ٹیم ہے۔
فواد چوہدری نے کہا کہ محسن نقوی کو پنجاب میں الیکشن رکوانے یا دھاندلی سے ہمارا راستہ روکنے کا ٹاسک دیا گیا ہے، ان کی تقرری کو عدالتوں میں چیلنج کریں گے۔
یاد رہے کہ الیکشن کمیشن نے حکومت اور اپوزیشن کی جانب سے تجویز کردہ مجموعی طور پر چاروں ناموں پر غور کرنے کے بعد محسن نقوی کو نگراں وزیراعلیٰ پنجاب مقررکیا ہے۔
الیکشن کمیشن کی جانب سے جاری اعلامیہ میں کہا گیا کہ آرٹیکل 224 اے 3 کے تحت نگراں وزیراعلیٰ پنجاب کی تعیناتی کا اہم اجلاس کمیشن میں ہوا اور کمیشن نے مکمل غورو خوض کے بعد سید محسن رضا نقوی کو نگراں وزیراعلیٰ پنجاب تعینات کردیا۔
