نیٹ فلکس کی مشہور زمانہ سیریز "منی ہائیسٹ” سے متاثر ہوکر بھارتی فلم ساز جوڑی ہدایت کار عباس مستان "تھری مونکیز” نامی فلم کی تیاریوں میں مصروف ہیں جس میں پروفیسر کا کردار ارجن رامپال کریں گے۔
نیٹ فلیکس کی سیریز "منی ہائیسٹ” کو ہندوستان میں بہت زیادہ پذیرائی ملی ہے، جس کو مدنظر رکھتے ہوئے بھارتی فلم سازوں نے بھی اس موضوع پر فلم بنانے کا ارادہ کیا ہے۔
بھارت کی فلم انڈسٹری کے دو بڑے نام اور ہدایت کار جوڑی عباس مستان کا شمار بالی ووڈ میں بہترین کرائم تھرلر فلم بنانے والوں میں ہوتا ہے۔
بھارتی میڈیا کے مطابق مشہور فلم ساز جوڑی اس سپر ہٹ سیریز کو ایک فلم میں ری میک کرنے کے لیے تیاری کررہی ہے اور ارجن رامپال کو اس کا مرکزی کردار یعنی پروفیسر کے لیے تیار کیا گیا ہے، فلم کا نام "تھری مونکیز” بتایا جا رہا ہے۔
اس کے علاوہ عباس کے بیٹے اداکار مصطفیٰ دو دیگر اداکاروں کے ساتھ ڈاکوؤں کا کردار ادا کریں گے، تینوں ڈاکو اس پروفیسر کے ساتھ ایک منفرد جہت کے حامل ہوں گے اور اپنے مقصد یعنی ذاتی فوائد کیلئے وارداتیں کریں گے۔
ذرائع کا کہنا ہے کہ عباس مستان کی اس فلم کی شوٹنگ ممبئی کے علاوہ متعدد مقامات پر کی جائے گی اور یہ سال2022کے درمیانی عرصے میں ریلیز ہوگی۔
یاد رہے کہ پروفیسر کا کردار اس فلم میں چوری کی ایک بہت بڑی واردات کا ماسٹر مائنڈ ہے جو کہ چیزوں کو پیچھے بنکر میں رہ کر چلاتا ہے اور اپنے کارندوں کو سمجھاتا ہے کہ کب کیا کرنے کا وقت ہے۔
دوسری جانب پروفیسر کا ہم شکل جس کی تصویر دیسی سوشل میڈیا پر وائرل ہو رہی ہے وہ اپنی کریانے کی دکان چلا رہا ہے اور اس دوران حساب کتاب میں مشغول ہے، حیران کن طور پر اس نے پروفیسر کی عینک سے ملتی جلتی عینک بھی لگا رکھی ہے جس نے اس کی مشابہت پروفیسر سے اور بڑھا دی ہے۔
عباس مستان کی ہدایت کاری میں بننے والی یادگار فلموں میں کھلاڑی، بازیگر، سولجر، اجنبی، اعتراز، ہمراز، ریس ون اور ٹو شامل ہیں۔ وہ فی الحال نیٹ فلیکس پر پینٹ ہاؤس کی ریلیز کی تیاری کر رہے ہیں جس میں بوبی دیول اور ارجن رامپال شامل ہیں۔
