اسلام آباد : ماہ صفر المظفر کا چاند نظر آگیا، مرکزی رویت ہلال کمیٹی نے تصدیق کردی، وزارت مذہبی امور کی جانب سے نوٹیفکیشن جاری کردیا گیا۔

اسلامی کلینڈر کے دوسرے ماہ صفر المظفر کا چاند نظر آگیا، یکم صفرالمظفر کل بروز جمعرات 16 جولائی 2026 کو ہوگی۔

مرکزی رویت ہلال کمیٹی کے اعلامیے کے مطابق ماہ صفرالمظفر1448 کا چاند دیکھنے کے لیے چیئرمین مرکزی رویت ہلال کمیٹی پاکستان مولانا عبد الخبیر آزاد کی زیر صدارت زونل رویت ہلال کمیٹی اسلام آباد کا اجلاس وزارت مذہبی امور و بین المذاہب ہم آہنگی پاکستان کوہسار کمپلیکس پاک سیکرٹریٹ اسلام آباد میں منعقد ہوا۔

چیئرمین مرکزی رؤیت ہلال کمیٹی پاکستان مولانا عبدالخبیر آزاد نے اعلان کیا کہ آج پاکستان کے اکثر و بیشتر مقامات پر مطلع صاف رہا اور چند مقامات پر مطلع ابر آلود بھی رہا اور پاکستان کے مختلف مقامات سے ماہ صفرالمظفر 1448 کے چاند نظر آنے کی شہادتیں موصول ہوئی ہیں۔

انہوں نے کہا کہ جہاں سے شہادتیں موصول ہوئیں ان میں نوکنڈی، سندھ اور دیگر مقامات شامل ہیں، لہٰذا اتفاق رائے سے فیصلہ کیا گیا کہ یکم صفرالمظفر1448ھ16جولائی 2026 بروز جمعرات کو ہوگی۔