اسلام آباد: وزیراعظم عمران خان آج مسلم لیگ (ق) کے رہنما اور وفاقی وزیرمونس الہی سے ون آن ون ملاقات کریں گے ، جس میں سیاسی صورتحال کے تناظر میں اتحادیوں کے لائحہ عمل پر گفتگو کی جائے گی۔
تفصیلات کے مطابق وزیراعظم عمران خان اور مسلم لیگ ق کی قیادت کے درمیان آج ایک اور ملاقات ہوگی، وزیراعظم وفاقی وزیرمونس الہی سے ون آن ون ملاقات کریں گے۔
ملاقات میں سیاسی صورتحال کے تناظر میں اتحادیوں کے لائحہ عمل پر بات چیت کی جائے گی، اس کے علاوہ وزیراعظم دیگر اتحادی جماعتوں کے قائدین سے بھی ملاقات کریں گے۔
یاد رہے چند روز قبل وزیر اعظم عمران خان نے چوہدری برادران کی رہائش گاہ کا دورہ کیا تھا، مسلم لیگ ق پنجاب اور مرکز دونوں میں حکومت کے اہم اتحادی ہیں۔
پنجاب اسمبلی کے اسپیکر اور مسلم لیگ ق کے رہنما پرویز الٰہی نے وزیراعظم کا استقبال کیا، مسلم لیگ (ق) کی قیادت اور حکمران تحریک انصاف کے درمیان ملاقات 40 منٹ تک جاری رہی جس میں ملک کی مجموعی سیاسی صورتحال سے متعلق امور پر تبادلہ خیال کیا گیا۔
وزیراعظم نے مسلم لیگ ق کے سربراہ چوہدری شجاعت حسین کی خیریت بھی دریافت کی۔
یاد رہے وفاقی وزیر فواد چوہدری کو ق لیگ نے مکمل حمایت کا یقین دلایا تھا ، پرویزالہی نے کہا تھا کہ ہم آپ کے اتحادی ہیں۔
خیال رہے ترجمان ق لیگ نے دعویٰ کیا تھا کہ وزارت اعلیٰ دروازے پر دستک دے رہی ہے ، سیاستدان وقت کے مطابق فیصلہ نہ کرے تو قیمت چکانا پڑتی ہے۔
