لاہور : ملک بھر میں بجلی چوروں کیخلاف آپریشن کے 4 روزمیں 80 لاکھ یونٹ سے زائد بجلی چوری پکڑی گئی اور 35 کروڑ 20 لاکھ روپے کے جرمانے کیے گئے۔
تفصیلات کے مطابق ملک بھر میں بجلی چوری کے خلاف کریک ڈاؤن کا سلسلہ جاری ہے، 4روز کی کارروائیوں کے دوران 80 لاکھ یونٹ سے زائد بجلی چوری پکڑی گئی۔
سیکرٹری پاورڈویژن نے بتایا کہ ملک بھر میں بجلی چوروں کو 35 کروڑ 20 لاکھ روپے جرمانے کیے گئے اور ملک بھر میں بجلی چوری کے 4 ہزار 702 کیسز پکڑے گئے۔
سیکرٹری پاور ڈویژن کا کہنا تھا کہ ملک بھر میں بجلی چوروں کے خلاف 1ہزار 529 ایف آئی آرز درج کی گئی ہے ، ملک میں بجلی چوروں کیخلاف 4ہزار 54درخواستیں متعلقہ تھانوں میں دی گئیں۔
پاور ڈویژن نے بتایا کہ 7سے11ستمبر بجلی چوروں کے خلاف کارروائی میں 194 افراد گرفتار ہوئے، بجلی چوری میں ملوث لاہور الیکٹرک سپلائی کمپنی کا ایک ملازم بھی گرفتار ہوا ہے۔
میپکو اور لیسکو میں سب سے زیادہ بجلی چوری کے کیسز پکڑے گئے ، ملتان الیکٹرک سپلائی کمپنی ریجن میں بجلی چوری کے 1ہزار 317 کیسز رپورٹ ہوئے جبکہ میپکو ریجن میں 4 روز میں 556 افراد کے خلاف ایف آر آرز درج کروائی گئیں۔
سیکرٹری پاور کا مزید بتانا تھا کہ لاہور الیکٹرک سپلائی کمپنی ریجن میں 1 ہزار 159کیسز رپورٹ ہوئے ، لیسکو ریجن میں بجلی چوروں کے خلاف اب تک 715 ایف آئی آرز درج کی گئی ہے، اس کے علاوہ گیپکو ریجن میں 128،فیسکو میں 201 اور آئیسکو میں 95 ، پیسکو ریجن میں 296،حیسکو 627کیسکو475 اورسیپکو سے 344 بجلی چوری کے کیسز رپورٹ ہوئے۔
