The news is by your side.

Advertisement

مشکوک کشتی سے 2 ارب سے زائد مالیت کی آئس ڈرگ برآمد

راولپنڈی میں منشیات فروشوں کے خلاف بڑی کارروائی، گاڑی سے 15 کلو سے زائد چرس برآمد

کوئٹہ: پاک بحریہ اور ڈائریکٹوریٹ آف کسٹم انٹیلی جنس نے بلوچستان کے علاقے پشوکان سے ملحقہ سمندر میں مشترکہ انسداد منشیات آپریشن میں 100 کلو گرام آئس ڈرگ برآمد کر لی۔

اے آر وائی نیوز کے مطابق پاک بحریہ نے ڈائریکٹوریٹ آف کسٹم انٹیلی جنس کے ساتھ مشترکہ آپریشن میں پشوکان، بلوچستان کے قریب سمندر میں ایک مشکوک کشتی سے سو کلوگرام آئس منشیات برآمد کر لی ہے۔

پاک بحریہ کے ترجمان کا کہنا تھا کہ یہ آپریشن انٹیلی جنس معلومات کی بنیاد پر کیا گیا، قبضے میں لی گئی منشیات کی مالیت تقریباً 2ارب 25 کروڑ روپے ہے۔

ترجمان کے مطابق منشیات اسمگلنگ کے خلاف کامیاب آپریشن پاک بحریہ کی سمندر میں مؤثر نگرانی کا نتیجہ ہے، برآمد شدہ منشیات اور گرفتار ملزم مزید قانونی کارروائی کے لیے ڈائریکٹوریٹ آف کسٹم انٹیلی جنس کے حوالے کر دیے گئے ہیں۔

ملزم یاسین جمال برآمد شدہ چرس کے پیکٹس کے ساتھ، جسے نیو ٹاؤن، راولپنڈی پولیس نے گرفتار کیا

راولپنڈی سے اے آر وائی نیوز کے نمایندے بابر ملک کے مطابق آج نیو ٹاؤن پولیس نے منشیات فروشوں کے خلاف بڑی کارروائی کرتے ہوئے ایک گاڑی سے 15 کلو سے زائد چرس برآمد کر کے ایک ملزم یاسین جمال کو گرفتار کر لیا جس کے انکشاف پر پولیس کانسٹیبل اظہر شیخ کو بھی گرفتار کر لیا گیا۔ ایس پی راول کا کہنا تھا کہ پولیس کانسٹیبل جرائم پیشہ عناصر کی پشت پناہی کرتا تھا۔

ایس ایچ او تھانہ نیو ٹاؤن مرزا جاوید اقبال نے دوران چیکنگ ملزم یاسین جمال کو گرفتار کر کے مہران کار سے 15 کلو 905 گرام چرس برآمد کی تھی، ملزمان کے خلاف مقدمہ درج کر لیا گیا ہے اور قانون کے مطابق کارروائی کی جا رہی ہے۔

Comments

یہ بھی پڑھیں