The news is by your side.

Advertisement

کویتی دینار کی طاقت ور ترین پوزیشن

کویت سٹی: دنیا بھر میں کرونا وائرس بحران کے باوجود کویتی دینار دنیا کی طاقت ور ترین کرنسی کی پوزیشن پر قائم رہا۔

تفصیلات کے مطابق 2021 تک کرونا بحران کے باوجود کویتی دینار کو دنیا کی طاقت ور ترین کرنسی تسلیم کیا جا رہا ہے، اس سلسلے میں گُڈ ریٹرنز نامی ویب سائٹ نے دس طاقت ور ترین کرنسیز کی فہرست جاری کی ہے۔

اس فہرست کے مطابق پہلے نمبر پر کویتی دینار نے اپنی پوزیشن برقرار رکھی ہے، حالاں کہ دنیا بھر میں کرونا وبا کی وجہ سے کرنسیوں کی قیمت میں بھی اتار چڑھاؤ آتا رہا، کویتی دینار مئی 2021 تک مضبوط گردش کرنے والی کرنسی رہی، جس میں ایک کویتی دینار 3.32 امریکی ڈالر کے برابر ہے۔

دوسرے نمبر پر بحرینی دینار رہا، جو مئی 2021 تک دوسری انتہائی قیمتی کرنسی رہی، شرح تبادلہ میں 1 بحرینی دینار 10 سعودی ریال کے برابر رہا۔

عمانی ریال سلطنت عمان کی قومی کرنسی ہے، اس وقت عمانی ریال کا دنیا کی قیمتی کرنسیوں میں تیسرا مقام ہے۔ چوتھے نمبر پر اردنی دینار ہے، جو اردن کی سرکاری کرنسی ہے۔

برطانیہ کی قومی کرنسی برٹش اسٹرلنگ پاؤنڈ دنیا کی سب سے قیمتی کرنسیوں میں پانچویں نمبر پر ہے، طاقت کے لحاظ سے یہ چار عربی کرنسیوں سے پیچھے ہے۔ چھٹے نمبر پر جبرالٹر پاؤنڈ جبرالٹر کی کرنسی ہے، یہ برابر قیمت پر برطانوی اسٹرلنگ پاؤنڈ سے منسلک ہے۔

ساتویں نمبر پر کیمان ڈالر ہے، جزیرے کیمین کیریبین کا ایک برطانوی علاقہ ہے۔ آٹھویں نمبر پر یورو ہے، یہ یوروپی یونین کے 28 ممبر ممالک میں سے 19 کی سرکاری کرنسی ہے، اس کے علاوہ اس کرنسی کی دنیا میں کرنسی کے تبادلے کی شرح سب سے زیادہ ہے۔

نویں نمبر پر سوئس فرانک ہے، سوئس فرانک اکثر بینک ڈپازٹ میں استعمال ہوتا ہے، جہاں رقم غیر ملکی اکاؤنٹس میں بھیجی جاتی ہے، کیوں کہ یہ دنیا کی مضبوط کرنسیوں میں سے ایک ہے، اور دنیا کی واحد کرنسی ہے جو مہنگائی سے متاثر نہیں ہوتی ہے۔

دسویں نمبر پر امریکی ڈالر ہے، امریکی ڈالر دنیا کی سب سے اہم ریزرو کرنسی ہے، اب تک کوئی بھی کرنسی امریکی ڈالر کو سب سے زیادہ تجارت کی جانے والی کرنسیوں کے طور پر تبدیل نہیں کر سکی ہے۔

Comments

یہ بھی پڑھیں