ایک رپورٹ میں افغانستان کو دنیا کا ناخوش ترین ملک قرار دیا گیا ہے۔
تفصیلات کے مطابق ورلڈ ہیپی نیس رپورٹ 2023 جاری کر دی گئی، جس میں افغانستان کا نمبر آخری یعنی 137 واں ہے۔
پیر کو جاری ہونے والی سالانہ رپورٹ کے مطابق فن لینڈ نے چھٹی مرتبہ دنیا کے سب سے خوش ملک ہونے کا اعزاز برقرار رکھا ہے، جب کہ دوسری طرف افغانستان اور لبنان دنیا کے ناخوش ترین ممالک قرار دیے گئے ہیں۔
سروے رپورٹ میں کہا گیا ہے کہ سیریا لیون، زمبابوے، کانگو، بوٹسوانا، ملاوی، کوماروس، تنزانیہ، زمبیا، مڈغاسکر نے بھی بالترتیب ناخوش ممالک میں جگہ پائی ہے۔
ان ممالک کے بعد پاکستان کے پڑوسی ملک بھارت کا نمبر 126 واں ہے، جس سے معلوم ہوتا ہے کہ بھارت بھی ناخوش ترین ممالک میں سے ایک ہے، کیوں کہ دیکھا جائے تو رینک میں نیچے آنے والے یہ باقی ممالک ہر لحاظ سے بھارت سے کم تر ہیں۔
واضح رہے کہ سروے کے مطابق فن لینڈ کے علاوہ ٹاپ ٹین ممالک کی فہرست میں ڈنمارک، آئس لینڈ، اسرائیل، ہالینڈ، سویڈن، ناروے، سوئٹزرلینڈ، لکسمبرگ اور نیوزی لینڈ بھی شامل ہیں۔
ورلڈ ہیپینیس رپورٹ ہر سال 20 مارچ کو خوشی کے عالمی دن کے موقع پر جاری کی جاتی ہے، اور اسے اقوام متحدہ کا ایک پلیٹ فارم ’سسٹینیبل ڈیولپمنٹ سلوشنز نیٹ ورک‘ شائع کرتا ہے۔
ورلڈ ہیپینیس رپورٹ اس لیے شائع کی جاتی ہے تاکہ ممالک اپنی پالیسیوں میں خوشی اور بہبود پر زیادہ توجہ مرکوز کریں، اس رپورٹ سے اندازہ ہوتا ہے کہ آج کی دنیا میں لوگوں کی خوشی کی حالت کیا ہے۔
