The news is by your side.

Advertisement

جادو ٹونے کی شوقین ماں نے بچوں کے ساتھ کیا کیا؟

ولیمزبرگ : امریکہ میں سفاک ماں نے پانچ بچوں کو گولیاں مار کر قتل کرکے گھر کو آگ لگادی، بعد ازاں خود کو بھی گولی مار کر زندگی کا خاتمہ کرلیا۔

غیر ملکی خبر رساں ادارے کی رپورٹ کے مطابق امریکی ریاست مغربی ورجینیا کے شہر ولیمزبرگ میں گھر میں آتشزدگی کے بعد پانچ بچوں کی لاشیں ملی تھیں جسے ان کی والدہ نے گولی مار کر ہلاک کیا جس کے بعد خاتون نے خود کشی کرلی۔

پولیس کے مطابق مغربی ورجینیا کی رہائشی25سالہ خاتون اوریانا مائرز نے22جنوری کو شاٹ گن سے پانچوں بچوں کو قتل کیا اور گھر میں آگ لگانےکے بعد خود کو گولی مار کر ہلاک کردیا تھا۔ بچوں کو قتل کرنے کے بعد مائرز نے اپنے شوہر برائن کو میسج بھی کیا۔

قتل ہونے والے5 بچوں میں سے تین اوریانا مائرز کے اپنے جبکہ دو بچے سوتیلے تھے، اس بات کا انکشاف دو مقتول سوتیلے بچوں7 سالہ شان اور6 سالہ ریلی کی والدہ 27 سالہ ریوین بومنگر نے پولیس کو بیان دیتے ہوئے کیا۔

ریوین بومنگر نے بتایا کہ اوریانا مائرز جادوئی عملیات پر یقین رکھتی تھی، اس حوالے سے اسے کچھ عجیب قسم کی غیر معمولی حرکات کرنے میں بھی جنون کی حد تک گہری دلچسپی تھی۔

سوتیلی ماں کے مطابق اوریانا اپنے فیس بک اور انسٹا گرام اکاؤنٹ پر بھی اسی قسم کی پوسٹ کیا کرتی تھی کہ جس میں چاند کے مراحل، ٹیرو کارڈز اور جادو سے متعلق مختلف کتابوں کا ذکر ہوتا تھا۔

امریکی میڈیا کے مطابق اوریانا نے اپنے اہل خانہ کے لئے متعدد خطوط چھوڑے تھے جس میں کہا جاتا ہے کہ اس نے بچوں کے قتل کا اعتراف کیا ہے۔

ایک خط میں اس نے لکھا ہے کہ یہ کسی کی غلطی نہیں ہے بلکہ میری اپنی ہے، مجھ پر شیطانوں نے فتح حاصل کرلی، معذرت چاہتی ہوں کہ میں اتنی مضبوط نہیں تھی۔

ذرائع کے مطابق واردات کے وقت اوریانا کا شوہر برائن کسی کام کے سلسلے میں کافی دن سے گھر سے باہر تھا دوسری جانب پولیس کو حاصل کردہ موبائل پیغامات کے مطابق برائن کی عدم موجودگی بھی خاتون پر ذہنی دباؤ کا سبب تھی۔

Comments

یہ بھی پڑھیں