واشنگٹن: امریکی ریاست انڈیانہ میں ماں کی لاپروائی کی وجہ سے 5 سالہ بچہ واشنگ مشین میں پھنس گیا، پولیس نے خاتون کے خلاف مقدمہ درج کرلیا۔
تفصیلات کے مطابق امریکی ریاست انڈیانہ میں ماں کی غفلت کے باعث واشنگ مشین میں پھنسنے والے 5 سالہ بچے کی حالت غیر ہوگئی، پولیس نے 30 سالہ خاتون ہیدر اولیور کے خلاف مقدمہ غفلت ولاپروائی کی دفعہ کے تحت درج کر لیا۔
اولیور نے پولیس کو بتایا کہ اسے لگا اس کا بیٹا بستر پر ہے اور وہ باورچی خانے میں دودھ کا گلاس لینے کے لیے گئی۔ خاتون نے بتایا کہ جب وہ واپس کمرے میں آئی تو اس نے واشنگ مشین میں پانی چلتے ہوئے سنا اور وہ یہ دیکھ کر دنگ رہ گئی کہ اس کا بیٹا واشنگ مشین کے اندر تھا۔
پولیس کا کہنا ہے کہ جب اولیور کے گھر کا معائنہ کیا گیا تو انہیں فرج میں دودھ یا دودھ والا گلاس کچھ بھی نہیں ملا۔
دوسری جانب 5 سالہ بچے نے انٹرویو کے دوران بتایا کہ اس کی والدہ اس کے ساتھ اچھا برتاؤ نہیں کرتی تھی بچے نے واشنگ مشین واقعے کے بارے میں کچھ نہیں کہا۔
دبئی : واشنگ مشین میں پھسنے کے باعث چار سالہ بچہ ہلاک
یاد رہے کہ رواں ماہ 13 دسمبر کو متحدہ عرب امارات کی ریاست عجمان کے علاقے ال روادا میں واقع بنگلے میں چار سالہ اماراتی بچہ واشنگ مشین میں پھسنے کے باعث ہلاک ہوگیا تھا۔
