کراچی : گرین پاکستان مہم کے دوران موٹروے پولیس نے صوبہ بھر میں7300پودے لگائے جن میں ماحول دوست پھل دار اور سایہ دار درخت شامل ہیں۔
تفصیلات کے مطابق آئی جی موٹر ویز اینڈ ہائی ویز پولیس عامر ذوالفقار خان اور ڈی آئی جی کراچی محمد سلیم کی خصوصی ہدایات پر صوبہ بھر میں گرین پاکستان مہم کے دوران 7300 پودے لگائے گئے ہیں۔
ڈی آئی جی موٹر وے پولیس کراچی محمد سلیم کا کہنا تھا کہ یہ پودے ماحول دوست ہیں، لگائے جانے والے پودوں میں زیادہ تر پھل دار اور سایہ دار ہیں اس قسم کے پودوں سے ہم ماحولیاتی تبدیلی سے بچ سکتے ہیں۔ شجرکاری مہم کے پہلے مرحلے میں دس ہزار پودے لگانے کا ہدف مکمل کیا جائے گا ۔
گرین پاکستان مہم کے دوسرے مرحلے میں نیشنل ہائی وے اتھارٹی کے تعاون سے پچاس ہزار پودے لگانے کا ہدف مکمل کیا جائے گا، ڈی آئی جی موٹر وے کراچی محمد سلیم کا مزید کہنا تھا کہ پودے ایسے مقامات پر لگائے گئے ہیں جہاں ان کو پانی دینے اور حفاظت کے انتظامات بھی میسر ہیں۔
انجم وہاب اے آر وائی نیوز سے وابستہ ہیں اور تجارت، صنعت و حرفت اور دیگر کاروباری خبریں دیتے ہیں