مٹیاری : موٹروے نوشہرو فیروز اور مٹیاری سیکشن میں ہونے والی پونے6ارب کرپشن کے مقدمے میں قومی احتساب بیورو نے ملزمان کیخلاف گھیرا مزید تنگ کردیا۔
اس سلسلے میں نیب کراچی کی ٹیم نے حیدرآباد اور سانگھڑ میں کارروائی کرکے مزید دو نامزد ملزمان ذیشان سہتو اور اخلاق شاہ کو گرفتار کرلیا۔
نیب حکام کے مطابق اخلاق شاہ اور ذیشان سہتو پر130ملین روپے وصول کرنے کا الزام ہے، ملزمان سے کرپشن کی رقم سے خریدی گئی نئے ماڈل کی گاڑی بھی برآمد کرلی گئی۔
نیب ذرائع کے مابق دونوں ملزمان کو پہلے سے گرفتار ملزم اسلم پیرزادہ کی نشاندہی پر گرفتار کیا گیا یہ ملزمان کرپشن کی رقم ایک جگہ سے دوسری جگہ منتقل کرنے میں ملوث ہیں۔
اس کے علاوہ کرپشن کیس میں ایک اور ملزم کو بھی شامل تفتیش کیا گیا ہے، وزیر ریونیو سندھ محبوب زمان کے قریبی مسرت جعفری کو طلبی کا نوٹس جاری کردیا گیا، کرپشن کیس میں اب تک ڈھائی ارب روپے سے زائد رقم برآمد کی جاچکی ہے۔
