لاہور: انسداد دہشت گردی کی عدالت نے موٹروے زیادتی کیس کا تحریری فیصلہ جاری کردیا۔
انسداد دہشت گردی کی خصوصی عدالت کے جج ارشد حسین بھٹہ کی جانب سے جاری ہونے والے فیصلے میں لکھا گیا ہے کہ عابد ملہی اور شفقت بگا کو اجتماعی زیادتی کے جرم میں موت کی سزا سنائی گئی۔
عدالتی فیصلے میں بتایا گیا ہے کہ دونوں مجرمان کو اغوا برائے تاوان میں عمر قید جبکہ ڈکیتی کے جرم میں 14، 14 سال قید کی سزا سنائی گئی۔
انسداد دہشت گردی کی عدالت سے جاری فیصلے کے مطابق خاتون کی زندگی خطرےمیں ڈالنے پر ملزمان کو 5،5سال اضافی قید کی سزا جبکہ خاتون کو زخمی کرنے پر 50، 50 ہزار روپے جرمانے کی سزا سنائی گئی۔
عدالتی فیصلے میں لکھا گیا ہے کہ ’خاتون کو زخمی کرنےکی ایک اور دفعہ کےتحت مجرمان کو 50ہزار روپے کی سزا سنائی گئی۔
عدالت نے فیصلے میں دونوں مجرمان کی تمام جائیدادیں ضبط کرنے کا حکم دیا اور لکھا کہ ہائی کورٹ کا فیصلہ آنے تک پھانسی کی سزا پر عمل نہ کیا جائے اور دونوں کو جیل میں محفوظ حراست میں رکھا جائے۔
واضح رہے کہ آج لاہور کی انسداد دہشت گردی کی عدالت نے لنک روڈ زیادتی کیس کا فیصلہ سنایا، جس میں دونوں ملزمان کو سزائے موت سنائی گئی تھی۔
