لاہور: پنجاب کے مختلف علاقوں میں شدید دھند کے باعث موٹر وے کو متعدد مقامات پر آمدو رفت کے لئے بند کردیا گیا ہے، موٹر وے پولیس نے عوام سے حفاظتی تدابیر اختیار کرنے کا کہا ہے۔
اے آر وائی نیوز کے مطابق موٹروے ایم 3 فیض پور سے درخانہ تک دھند کی وجہ سے بند ہے جبکہ لاہور سیالکوٹ موٹروے دھند کے باعث بند کردی گئی ہے۔
ترجمان موٹروے پولیس کے مطابق موٹروے ایم 4 شورکوٹ سے فیصل آباد تک دھند کی وجہ سے بند کردی گئی ہے اس کے علاوہ موٹروے ایم 5 شیر شاہ سے ظاہر پیر تک دھند کی وجہ سے بند کردی گئی ہے۔ شور کوٹ شہر اور گردو نواح میں دھند کے باعث حدنگاہ متاثر ہے۔
ترجمان موٹروے پولیس کے مطابق موٹروے بند کرنے کا مقصد حادثات سے بچاؤ اور موٹروے استعمال کرنے والوں کے جان و مال کا تحفظ ہے، شہریوں سے درخواست ہے کہ دھند کہ اوقات میں غیر ضروری سفر سے گریز کریں۔
اپنا سفر دن کی روشنی میں مکمل کر کے دھند کے آغاز سے پہلے اپنے منزل مقصود تک پہنچ جائیں – گاڑیوں میں فوگ لائٹس کا استعمال کریں، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔
مرگی کا دورہ پڑنے کے بعد لڑکی کے ساتھ دلدوز واقعہ
ترجمان موٹروے پولیس کا کہنا ہے کہ سفر شروع کرنے سے پہلے موٹروے پولیس ہیلپ لائن 130 یا نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات ضرور حاصل کرلیں۔