شہزادی ایلسا اور اینا کی ’فروزن‘ یونیورس کو توسیع دینے کا فیصلہ کیا گیا ہے، اب اسے شائقین کے لیے اسٹوری ٹیلنگ پوڈ کاسٹ سیریز کے طور پر بھی پیش کیا جائے گا۔
غیرملکی انٹرٹینمنٹ آؤٹ لیٹ کے ذرائع نے بتایا کہ فرنچائز کی پہلی فلم کے ریلیز ہونے کی دسویں سالگرہ کے موقع پر ڈزنی کی سپرہٹ اینیمیٹڈ فلم ’فروزن‘ اپنے سیکوئل کے ساتھ واپس آرہی ہے، تاہم یہ سیکوئل تیسری مووی (جس پر کام جاری ہے) سے قبل آئے گی اور پوڈ کاسٹ سیریز کے فارمیٹ میں ہوگی۔
سامنے آنے والی تفصیلات کے مطابق ڈزنی پبلشنگ ورلڈ وائیڈ، اے بی سی آڈیو اور والٹ ڈزنی اینی میشن اسٹوڈیوز کی جانب سے اپنی نوعیت کی پہلی آڈیو سیریز متعارف کرائی جائے گی، جسے ’فروزن: فورسز آف نیچر‘ کا نام دیا گیا ہے، اسے ’فروزن ٹو‘ میں ہونے والے واقعات کے بعد کے لحاظ سے اور ’فروزن تھری‘ سے پہلے کے واقعات کے تحت ترتیب دیا جائے گا۔
دلچسپ بات یہ ہے کہ 12 حصوں پر مشتمل سیریز میں ایلسا اور اینا کے ساتھ دو نئے کرداروں، کوئین ڈیسا اور لارڈ وولف گینگ کو بھی متعارف کرایا جائے گا، ملکہ ڈیسا ’سانکرہوس‘ کی حکمران ہے جب کہ لارڈ وولف ڈیوک آف ویسلٹن کا بھتیجا ہے۔
اے بی اسی اسٹوڈیو کی وائس پریزیڈنٹ لز الیسے نے اسٹوری ٹیلنگ پوڈ کاسٹ کے حوالے سے خیالات کا اظہا کرتے ہوئے کہا کہ ڈزنی فروزن پوڈ کاسٹ کے ذریعے اے بی سی آڈیو کہانی سنانے کی انفرادیت کو نئی نسل میں متعارف کروانے کے لیے پُرجوش ہے۔