The news is by your side.

Advertisement

فاروق بھائی 5 مئی کو جلسے میں آئیں باقی معاملات بھی طے کرلیں گے، خالد مقبول صدیقی

ایم کیو ایم بہادر آباد کے رہنماؤں کا جلسے سے قبل ٹنکی گرؤانڈ کا دورہ، مہاجر قومی موومنٹ کی جانب سے بھی 6 مئی کے جلسے میں شرکت کی دعوت

کراچی: بہادرآباد گروپ کے سربراہ خالد مقبول صدیقی نے کہا ہے کہ فاروق بھائی 5 مئی کو جلسے میں آئیں باقی معاملات بھی طے کرلیں گے۔

تفصیلات کے مطابق ایم کیو ایم بہادر آباد کے رہنماؤں نے جلسے سے قبل ٹنکی گرؤانڈ کا دورہ کیا۔ دورے میں شامل رہنماؤں  خالد مقبول، کنور نوید اور فیصل سبزواری نے جلسے کے انتظامات کا جائزہ لیا۔

 بہادرآباد گروپ کے سربراہ خالد مقبول صدیقی نے میڈیا سے بات کرتے ہوئے کہا کہ ہم کسی کی دکان بند کرانے نہیں بلکہ جلسے کے انتظامات دیکھنے آئے ہیں۔

خالد مقبول کا کہنا تھا کہ ہمارے پاس 85 فیصد مینڈیٹ ہے، ہمیں کسی سے اجازت کی ضرورت نہیں ہے۔ کراچی میں رہنے والوں کو اجازت بھی کراچی کے عوام دیں گے، ہم چاہتے ہیں کاغذی اجازت مل جائے ورنہ جلسہ تو ہرصورت کریں گے۔

ایم کیو ایم بہادر آباد گروپ کے رہنما کا کہنا تھا کہ میرا فاروق ستار سے آج دوسری مرتبہ رابطہ ہوا ہے، مجھے مشترکہ پریس کانفرنس کا نہیں پتا، سوشل میڈیا کے ذریعے معلوم ہوا۔ انھوں نے کہا کہ 5 مئی کا جلسہ سندھ کی سیاست میں اہم سنگ میل ثابت ہوگا جس کے لیے ہم نے تمام سیاسی جماعتوں کو جلسے میں شرکت کی دعوت دی ہے۔

لیاقت آباد میں پی پی نےجونفرت پھیلائی اس کا جواب دیں گے‘ خالد مقبول صدیقی

خالد مقبول صدیقی کا کہنا تھا کہ کچھ دن پہلے دیہی سندھ کا مینڈیٹ رکھنے والی جماعت نے جلسہ کیا تھا، پیپلزپارٹی نے جلسے میں خراب زبان استعمال کی۔ واضح رہے کہ چند دن قبل لیاقت آباد میں پیپلز پارٹی کے جلسے میں بلاول بھٹو زرداری نے ایم کیو ایم کے اندر ٹوٹ پھوٹ اور دھڑے بندیوں کی طرف اشارہ کرکے تنقید کی تھی کہ جو ایک ساتھ مل بیٹھ نہیں سکتے وہ کراچی کے مسائل کیا حل کریں گے۔

فاروق ستار کی رہائش گاہ پر


ایم کیوایم بہادر آباد کے رہنما فیصل سبزواری نے فاروق ستار کی رہائش گاہ پر ان سے ملاقات کی اور ان کو 5 مئی کے جلسے میں شرکت کی دعوت دی۔ فیصل سبزواری نے فاروق ستار سے کہا کہ آئیں مل کرجلسہ کرتے ہیں، ہمیں انا کو چھوڑ کر ایک ہونا ہوگا۔ جس کے جواب میں فاروق ستار نے کہا کہ میں بھی یہی چاہتاہوں، الگ الگ جلسوں سےغلط تاثر جائے گا۔

دوسری طرف مہاجر قومی موومنٹ کے وفد نے بھی ڈاکٹر فاروق ستار کی رہائش گاہ پر ان سے ملاقات کی۔ وفد میں نعیم حشمت، شاہد فراز، کامران رضوی اور تنویر قریشی شامل تھے۔ ایم کیو ایم کے عبدالوسیم، جاوید کاظمی، ارشد شاہ و دیگر نے وفد کا استقبال کیا۔ وفد نے فاروق ستار کو 6 مئی کے جلسے میں شرکت کی دعوت دی۔ وفد کا کہنا تھا کہ مہاجروں کا ایک پلیٹ فارم پر آنا ضروری ہے، تاہم فاروق ستار نے جواب میں کہا کہ جلسے میں شرکت سے متعلق فیصلہ رابطہ کمیٹی کے اجلاس میں کریں گے۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں