کراچی : بلدیاتی انتخابات سے قبل حلقہ بندیوں کے معاملے پر ایم کیو ایم پاکستان اور جماعت اسلامی میں رابطہ ہوا ہے، وسیم اختر نے حافظ نعیم الرحمان کو ٹیلی فون کردیا۔
تفصیلات کے مطابق کراچی کی سیاست میں ہر لمحہ بدلتی صورت حال کے منظرنامے میں ایک اور تبدیلی سامنے آئی ہے متحدہ قومی موومنٹ نے جماعت اسلامی سے رابطہ کیا ہے،
اس حوالے سے ذرائع کا کہنا ہے کہ ایم کیوایم پاکستان کے رہنما وسیم اختر نے جماعت اسلامی کراچی کے امیر حافظ نعیم الرحمان سے ٹیلیفونک رابطہ کیا ہے۔
ذرائع کے مطابق ایم کیو ایم پاکستان کا وفد کل دوپہر ایک بجے جماعت اسلامی کراچی کے مرکز ادارہ نورحق کا دورہ کرے گا، متحدہ کا وفد جماعت اسلامی کو اپنے احتجاج میں شرکت کی دعوت دے گا۔
وسیم اختر کا کہنا ہے کہ حلقہ بندیاں صرف ایم کیوایم پاکستان کا نہیں بلکہ کراچی اور حیدرآباد کا دیرینہ مسئلہ ہے، شہر کی سیاسی قوتوں کو ذاتی مفادات بالائے طاق رکھ کر ایک توانا آواز بننے کی ضرورت ہے۔
مزید پڑھیں : بلدیاتی انتخابات پر پی ٹی آئی اور جماعت اسلامی میں رابطہ
واضح رہے کہ اس سے قبل پاکستان تحریک انصاف کے پارلیمانی رہنما خرم شیر زمان نے جماعت اسلامی کراچی کے امیر حافظ نعیم الرحمٰن کو فون کرکے بلدیاتی انتخابات کے حوالے سے مشترکہ حکمت عملی کی ضرورت پر زور دیا۔
