کراچی: متحدہ قومی موومنٹ پاکستان کے کنوینر خالد مقبول صدیقی نے کہا ہے کہ ابھی تو صرف ایم کیو ایم کے کارکنان آئے ہیں، پورا شہر لے کر نکلے تو حکمرانوں کو چھپنے کی جگہ نہیں ملے گی۔
تفصیلات کے مطابق کراچی میں مظاہرے سے خطاب کرتے ہوئے کنوینر ایم کیو ایم پاکستان نے کہا کہ یہاں 11 سال سے وڈیرے اور جاگیر داروں نے معاشی دہشت گردی مچا رکھی ہے، پاکستان کو بچانے کے لیے کراچی کو بچانا ضروری ہے۔
ڈاکٹر خالد مقبول صدیقی کا کہنا تھا کہ ہم کچھ نہیں مانگتے، ہم تو اپنا لوٹا ہوا پیسا مانگتے ہیں، ایم کیو ایم کی بلدیاتی حکومت نے پہلا ماس ٹرانزٹ منصوبہ منظور کرایا، بد قسمتی سے تب پیپلز پارٹی کی حکومت تھی اور یہ منصوبہ مکمل نہ ہو سکا۔
ایم کیو ایم کے سربراہ نے کہا کہ ہم نے پاکستان بنایا تھا اور ہم پاکستان کو بچائیں گے، یہ شہر صوبے کو 95 فی صد اور وفاق کو 70 فی صد دیتا ہے، اور اب وفاق کہتا ہے کہ پانی کا منصوبہ کراچی کے لیے قابل عمل نہیں ہے۔
یہ بھی پڑھیں: کراچی کو سازش کے تحت پانی فراہم نہیں کیا جا رہا: خالد مقبول صدیقی
وفاقی وزیر برائے آئی ٹی خالد مقبول صدیقی نے کہا کہ کراچی پیسا دیتا ہے تو وفاق پلتا ہے، وزیر اعظم صاحب ہمیں صرف انصاف چاہیے۔
یاد رہے کہ گزشتہ روز پریس کلب پر پانی کی عدم فراہمی کے سلسلے میں احتجاجی مظاہرے سے خطاب میں خالد مقبول نے کہا کہ کراچی کو سازش کے تحت پانی فراہم نہیں کیا جا رہا، ریاست کی ذمہ داری ہے کہ وہ تحفظ فراہم کرے، اگر لوگ اپنی جماعت کو چھوڑ کر جا رہے ہیں تو یہ بھی عدم تحفظ کی دلیل ہے۔
