The news is by your side.

Advertisement

متحدہ لندن قیادت کا بلاول کے بیان کا خیرمقدم

کراچی: متحدہ قومی موومنٹ لندن کے کنوینر ندیم نصرت نے بلاول بھٹو زرداری کے مائنس ون کے خلاف خیالات کا خیر مقدم کرتے ہوئے کہا ہے کہ ایم کیو ایم کے بارے میں چیئرمین پیپلزپارٹی کے خیالات نہایت مثبت اور حقیقت پسندانہ ہیں۔

لندن سے جاری کردہ اعلامیے میں کنوینر ایم کیو ایم ندیم نصرت نے کہا کہ بانی ایم کیو ایم کے بارے میں بلاول بھٹو کے خیالات نہایت مثبت اور حقیقت پسندانہ ہیں، اختلافات کی بنیاد پر کسی عوام شخص کو منظر نامے سے ہٹانے کی کوشش مناسب نہیں ہے۔

کنوینر ایم کیو ایم لندن نے بلاول بھٹو کے مائنس ون فارمولے پر بیان کا خیرمقدم کرتے ہوئے کہاکہ ’’کسی بھی معاملے کو اپنی ذاتی انا کا مسئلہ بنانا ملکی مفاد میں نہیں، ملک کی ترقی و خوشحالی کے لیے سیاسی حقیقتوں کو تسلیم کیا جانا چاہیے‘‘۔

mqm-l

ندیم نصرت نے کہا کہ دنیا بھر میں کسی بھی مسئلے کو حل کرنے کے لیے بات چیت کا راستہ اختیار کیا جاتا ہے تاہم ذاتی انا کی خاطر کسی کو منظر عام سے ہٹانا درست عمل نہیں ہے۔

انہوں نے تجویز دیتے ہوئے کہا کہ تمام معاملات کو حل کرنے کے لیے بات چیت کی راہ اپناتے ہوئے اپنی پالیسی پر نظر ثانی کرنی چاہیے۔

پڑھیں: انکل الطاف کراچی کی سیاسی حقیقت تھے اور ہیں 

 اُن کا کہنا تھا کہ سیاسی اور جمہوری لوگ مائنس ون کے فارمولے پر یقین نہیں رکھتے بلکہ ان کا ماننا یہ ہے کہ عوام میں مقبول لیڈران کو کسی بھی ظلم و تشدد اور جبر کے ذریعے مائنس نہیں کیا جاسکتا۔

رکن رابطہ کمیٹی گلفراز خٹک کی گرفتاری کی مذمت اور رہائی کا مطالبہ

قبل ازیں ایم کیو ایم کنونیر ندیم نصرت نے سابق رکن گلفراز خان خٹک کی غیر قانونی گرفتاری اور انہیں جھوٹے مقدمات میں ملوث کرنے کی سخت الفاظ میں مذمت کرتے ہوئے انہیں فی الفور رہا کرنے کا مطالبہ کیا۔

ندیم نصرت نے اپنے ایک بیان میں کہا کہ ’’ایم کیو ایم کو ختم کرنے اور بے گناہ کارکنان کی بلاجواز گرفتاریوں کا سلسلہ بدستور جاری ہے‘‘۔ انہوں نے کہا کہ گلفرازخٹک پیشے کے لحاظ سے وکیل ہیں باوجود اس کے قانون نافذ کرنے والے اداروں نے انہیں انسداد دہشت گردی کی عدالت کے باہر سے گرفتار کیا۔

انہوں نے کہا کہ ماضی میں بھی ایم کیو ایم کے رہنماؤں، منتخب نمائندوں ، ذمہ دار اور کارکنا کو بلاجواز گرفتار کرکے سیاسی وفاداریاں تبدیل کرائی گئی ہیں اور گلفراز خٹک کی گرفتاری اسی سازش کا تسلسل ہے ۔ ندیم نصرت نے وزیراعظم، وزیر داخلہ اور وزیراعلیٰ سندھ سے مطالبہ کیا کہ گلفراز خٹک کی بلاجواز گرفتاری اور انہیں جھوٹے مقدمات میں ملوث کرنے کا فوری نوٹس لے کر رہا کیا جائے ۔

Comments

comments

یہ بھی پڑھیں