کراچی (22 جنوری 2026): ایم کیو ایم پاکستان کے رہنما اور وفاقی وزیر مصطفیٰ کمال نے کراچی کو وفاق کا حصہ بنانے کا مطالبہ کر دیا ہے۔
اے آر وائی نیوز کے مطابق متحدہ قومی موومنٹ پاکستان کے رہنما اور وفاقی وزیر صحت مصطفیٰ کمال نے کراچی میں پریس کانفرنس کرتے ہوئے 18 ویں ترمیم ختم کرنے اور کراچی کو وفاق کا حصہ بنانے کا مطالبہ کیا اور کہا کہ اس حوالے سے وفاق آرٹیکل 148 اور 149 کے اختیارات کو استعمال کرے۔
مصطفیٰ کمال کا کہنا تھا کہ 18 ویں ترمیم سے عوام کو کوئی فائدہ نہیں ہوا بلکہ یہ ہمارے لیے ناسور بن گئی ہے۔ ریاستی اداروں سے کہنا چاہتا ہوں بس اب بہت ہو گیا، اٹھارویں ترمیم کا ڈراما ختم ہو جانا چاہیے کیونکہ پاکستان کو بچانے اور چلانے کے لیے اس کا خاتمہ بہت ضروری ہے۔
انہوں نے کہا کہ اٹھارویں ترمیم میں صوبوں کو جو ناجائز طاقت دی گئی، وہ ہمیں مار رہی ہے۔ یہ ترمیم ہماری نسل کشی کے لیے استعمال ہو رہی ہے، جو جمہوری دہشت گردی ہے۔ سندھ میں اس جمہوری دہشتگردی کو ختم کرنے کے لیے اس ترمیم کو فوری ختم کیا جائے، اس حوالے سے ہم ہر طرح کی حمایت کریں گے۔
رہنما ایم کیو ایم نے کہا کہ انہوں نے مزید کہا کہ گُل پلازہ آتشزدگی میں معصوم لوگوں کے مرنے کا افسوس ہے اور متاثرین کے دکھ میں برابر کے شریک ہیں۔ پیپلز پارٹی کی صوبے میں 18 سال سے حکومت ہے اور کراچی میں روز کئی لوگ مر رہے ہیں۔ اگر پیپلز پارٹی کی صوبائی حکومت نے کچھ کرنا ہوتا تو آج یہ نہ ہو رہا ہوتا۔
مصطفیٰ کمال نے یہ بھی کہا کہ جب تک شفاف مردم شماری نہیں ہو گی، ہماری صوبائی حکومت نہیں آئے گی۔ پیپلز پارٹی کو کھلی آزادی دیدی گئی جو چاہے کرو۔ وزیراعظم چاہتے ہوئے بھی اس صوبےکیلیے کچھ نہیں کر سکتے کیونکہ پی پی ناراض ہو جاتی ہے۔ میں ریاستی اداروں سے کہنا چاہتا ہوں کہ 18 ویں ترمیم ختم کی جائے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں