کراچی : ایم کیوایم پاکستان کراچی کے حقوق کیلئے ‘کراچی مارچ’ آج ہوگا ، اس سلسلے میں عائشہ منزل سے مزار قائد تک ریلی نکالی جائے گی۔
تفصیلات کے مطابق کراچی کے حقوق کے لیے ایم کیو ایم پاکستان کے کراچی مارچ کی تیاریاں مکمل کرلی گئیں، عائشہ منزل سےمزار قائدتک ہونے والے مارچ کا آغاز دوپہر دو بجے ہوگا۔
کراچی مارچ عائشہ منزل ، کریم آباد ، لیاقت آباد دس نمبر ، ڈاک خانے ، تین ہٹی ، گرومندر سے ہوتا ہوا مزار قائد پر اختتام پذیر ہوگا ، مارچ کی گزرگاہوں پر پارٹی پرچم آویزاں ، جگہ جگہ استقبالیہ کیمپس بھی لگا دئیے گئے ہیں جبکہ عائشہ منزل پر شہر بھر سے ریلیوں کے استقبال کیلئے مرکزی استقبالیہ کیمپ قائم کیا گیا ہے۔
ایم کیو ایم نے تمام شعبہ ہائے زندگی سے تعلق رکھنے والے افراد، تاجر برادری ،ڈاکٹرز،علماء کرام ،وکلاء سمیت شہریوں سے بڑی تعداد میں شرکت کی اپیل کی ہے۔
کراچی مارچ کے اہم نکات میں کراچی کے مسائل ، حقوق کی واپسی اور شہری سندھ کے ساتھ کی جانے والی ناانصافیوں پر بات ہوگی۔
ذرائع کا کہنا ہے کہ ایم کیو ایم مارچ کے ذریعے جنوبی سندھ صوبے کی تحریک کا آغاز کرے گی، ایم کیو ایم جعلی مردم شماری ، ملازمتوں اور تعلیمی اداروں میں کوٹہ سسٹم کی آڑ میں ناانصافیوں ، جعلی ڈومیسائل پر بھرتیوں ، کراچی پیکج پر عمل درآمد نہ ہونا اہم نکات میں شامل ہیں۔
مارچ میں بلدیاتی اختیارات اور اداروں کی واپسی سمیت صوبائی حکومت کی بیڈ گورننس پر وائٹ پیپر بھی عوام کے سامنے رکھا جائے گا۔
استقبالیہ کیمپ پر میڈیا سے گفتگو میں عامرخان کا کہنا تھا کہ گزشتہ بارہ سال سےسندھ حکومت کاشہری علاقوں سےناانصافیاں کاسلسلہ جاری ہے، نوکریوں میں شہری سندھ کےنوجوان پیپلزپارٹی کی حکومت کونظرنہیں آتے۔
ان کا کہنا تھا کہ لاڑکانہ سےایڈمنسٹریٹرکراچی تعینات کرکےشہرکنٹرول کرنیکی کوشش کی گئی، وفاقی حکومت کےکراچی پیکج کےنام پروعدہ وفانہیں ہوا، مارچ یہ طے کرے گا کہ کراچی ایم کیوایم کا تھا ،ہے اور رہےگا۔
