The news is by your side.

Advertisement

متحدہ قومی موومنٹ اب محلہ قومی موومنٹ بن چکی ہے، مرتضٰی وہاب

کراچی : مشیر اطلاعات سندھ مرتضٰی وہاب نے طنزیہ انداز میں ایم کیوایم سے اظہار ہمدردی کرتے ہوئے کہا ہے کہ متحدہ قومی موومنٹ محلہ قومی موومنٹ بن چکی ہے۔

یہ بات انہوں نے اے آر وائی نیوز سے گفتگو کرتے ہوئے ایم کیو ایم پاکستان کے ہونے والے جلسے میں شرکاء کی تعداد کے حوالے سے اپنے رد عمل میں کہی، مرتضیٰ وھاب نے کہا کہ متحدہ قومی موومنٹ پاکستان کے جلسے سے زیادہ لوگ تو بقرعید پر گائے دیکھنے آجاتے ہیں۔

ایم کیوایم رہنماؤں کو نہ جانے کیا سوجھی کہ منی جلسہ کرکے مزید رسوا ہوگئے، مرتضیٰ وہاب کا مزید کہنا تھا کہ شہر کراچی میں مختلف مقامات پر لگنے والے خیرات کے دسترخوانوں پر بھی ایم کیوایم کے جلسے سے زیادہ لوگ موجود ہوتے ہیں۔

انہوں نے کہا کہ اب متحدہ قومی موومنٹ محلہ قومی موومنٹ بن چکی ہے، سندھ کو  تقسیم کرنے کی سیاست اور خواب دیکھنے والے خود تقسیم ہوچکے ہیں۔

مشیراطلاعات سندھ مرتضیٰ وہاب نے مزید کہا کہ ایم کیوایم جب بھی اقتدار سے دور رہی انہوں نے ایسے ہی الزام لگائے، کراچی کے مسائل کے ذمہ دار40سال تک یہاں حکمرانی کرنے والے ہیں، ایم کیوایم کا فلسفہ کبھی بھی عوام کی خدمت نہیں رہا، اس کا مقصد صرف اور صرف اقتدار ہے۔

 

Comments

comments

یہ بھی پڑھیں