site
stats
پاکستان

کراچی:فاروق ستار کے گھرکا محاصرہ، ایم کیوایم کا آج احتجاج کا اعلان

کراچی : ایم کیو ایم نے رہنما فاروق ستار کے گھر پر محاصرے کیخلاف آج یوم احتجاج منانے کا اعلان کیا ہے۔

تفصیلات کے مطابق متحدہ قومی موومنٹ کی رابطہ کمیٹی نے ڈاکٹرفاروق ستارکے گھرکے محاصرے کی مذمت کرتے ہوئے آج کراچی سمیت سندھ بھرمیں یوم احتجاج منانے کا اعلان کیا ہے اور عوام سے اپیل کی ہے کہ وہ کاروباراورٹرانسپورٹ بند رکھیں۔

رابطہ کمیٹی نے بیان میں کہا کہ گزشتہ شب رینجرز کی بھاری نفری نے پی آئی بی کالونی میں ڈاکٹرفاروق ستار کے گھر اور پورے علاقے کا کئی گھنٹے تک محاصرہ کیا لوگوں کو تراویح کی ادائیگی تک کیلئے گھروں سے باہرنکلنے نہیں دیا گیا۔

رابطہ کمیٹی نے کہاکہ کارکنوں کی گرفتاریوں اور ڈاکٹر فاروق ستار کے گھر کا محاصرہ ایک بار پھر ثابت کرتا ہے کہ کراچی میں آپریشن صرف اورصرف ایم کیوایم کے خلاف کیا جارہا ہے، رابطہ کمیٹی نے عوام سے اپیل کی کہ وہ آج احتجاج کے طور پر اپنا کاروبار اور ٹرانسپورٹ بند رکھیں اور پرامن اندازمیں اپنا احتجاج ریکارڈ کرائیں۔

رابطہ کمیٹی نے انسانی حقوق کی تنظیموں سے بھی اپیل کی کہ وہ مہاجر عوام کے خلاف کی جانے والی انسانی حقوق کی خلاف ورزیوں کا نوٹس لیں۔

رابطہ کمیٹی نے کہا کہ گذشتہ دنوں ڈاکٹر فاروق ستار کے کوآرڈینیٹر آفتاب احمد کو گرفتار کرکے ماورائے عدالت قتل کردیاگیا جس میں ملوث اہلکاروں کوگرفتار کرنے کے بجائے ڈاکٹرفاروق ستار کے گھر کا محاصرہ گیا گیا، جس کی جتنی بھی مذمت کی جائے کم ہے۔

کراچی میں نظام زندگی معمول کے مطابق جاری ہے، ٹریفک رواں دواں، پیٹرول پمپس بھی کھلے ہیں۔

دوسری جانب ڈی جی رینجرز کا کہنا ہے کہ آج کسی قسم کی ہڑتال نہیں ہوگی، شہری مکمل آزادی کے ساتھ کاروبار کھولیں، تحفظ دیا جائیگا۔

انھوں نے مزید کہا کہ شہرمیں دکانیں بند کرانے والوں سے سختی سے نمٹیں گے، شہری مکمل آزادی کے ساتھ گاڑیاں سڑکوں پر لائیں، رینجرز شہریوں کے تحفظ کے لئے سڑکوں پر موجود ہوگی۔

یاد رہے کہ کراچی کے علاقے پی آئی بی کالونی میں رینجرز نے ایم کیو ایم کے سینیئر رہنما فاروق ستار کے گھر کا محاصرہ کر کے علاقے کو سیل کردیا تھا اور آنے جانے والوں سے پوچھ گچھ کی، زرائع کا کہنا تھا کہ رینجرز اہلکاروں نے فاروق ستار کے گھر کا محاصرہ وہاں رکن سندھ اسمبلی کامران فاروقی کے موجود ہونے کی اطلاع پر کیا تھا، رینجرز اہلکار کچھ دیر بعد محاصرہ ختم کرکے واپس چلے گئے۔

فاروق ستار کا کہنا تھا کہ وہ ملک دشمن نہیں، ارکان پارلیمنٹ کے گھروں کے محاصرےٹھیک نہیں، انہوں نے کہا ضمانت دیتا ہوں کہ میرے گھر پر کوئی مطلوب شخص موجود نہیں۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top