کراچی: ایم کیوایم رہنما فاروق ستار نے کہا ہے کہ کراچی میں امن کےلیے ہم بھی شراکت دارہیں، ایم کیوایم ہمیشہ جبری چندے کے خلاف رہی ہے ۔
لال قلعہ گراؤنڈ میں منعقدہ سانحہ پکا قلعہ کی 26ویں برسی کے موقع پر ایم کیو ایم کے رہنما فاروق ستار کا کہنا تھا کہ رمضان المبارک میں زکوٰۃ ، فطرہ منتخب نمائندے ، بلدیاتی چیئرمین ، وائس چیئرمین جمع کریں گے۔
انہوں نے کہا کہ گزشتہ سال بھی ایم کیو ایم کو فلاحی کاموں سے روکا گیا، ایم کیو ایم کا فلاحی ادارہ وضع کردہ طریقہ کار کے مطابق ضرور فطرہ، زکوٰۃ جمع کرے گا اور ایم کیو ایم کے منتخب نمائندوں کے پاس اتھارٹی لیٹر ہو گا۔
ڈاکٹر فاروق ستار کا کہنا تھا کہ ایم کیو ایم کے کارکنان کی گرفتاری کا سلسلہ تیز ہو گیا ہے اور یہ گرفتاریاں انہیں فطرہ جمع کرنے سے روکنے کی سازش ہے۔
ڈاکٹر فاروق ستار نے مزید کہا کہ ایم کیو ایم عوام کی خدمت کرنا چاہتی ہے اور صرف رضاکارانہ طور پرچندہ، زکوٰۃ، فطرہ وصول کرتی ہے۔
