ایم کیو ایم کے اسیر کارکن کو سپردخاک کردیا گیا -
The news is by your side.

Advertisement

ایم کیو ایم کے اسیر کارکن کو سپردخاک کردیا گیا

کراچی : متحدہ قومی موومنٹ شاہ فیصل ٹاؤن کے اسیر کارکن وحید شیخ شہید کو شاہ فیصل کالونی عظیم پورا کے قبرستان میں آج سپرد خاک کردیاگیا۔

تفصیلات کے مطابق ایم کیو ایم کے کارکن وحید شیخ کی نماز جنازہ شاہ فیصل کالونی میں واقع اللہ والی مسجد میں ادا کی گئی نما زجنازہ اور تدفین میں کارکن کے اہل خانہ،ایم کیوایم کی رابطہ کمیٹی کے ارکان اوراراکین اسمبلی سمیت سیکڑوں کارکنان اورعلاقہ مکینوں نے شرکت کی۔

نماز جنازہ اورتدفین کے بعد میڈیا کے نمائندگان کو پریس بریفنگ دیتے ہوئے ایم کیوایم کی رابطہ کمیٹی کے رکن عارف خان ایڈووکیٹ نے کہاکہ وحید شیخ کو دو ماہ قبل اُن کے گھر سے گرفتار کیا گیا تھا وہ پہلے ہی شدید علیل تھے اور اُن کے پاؤں کا زخم ناسور بن چکا تھا اس کے باوجود رینجرز نے انہیں تشدد کا نشانہ بنایا اور 24 جولائی کو ماڈل تھانہ کے حوالے کردیا۔

بعد ازاں انہیں جیل کسٹڈی میں دے دیا گیا اس پورے عرصے میں جیل میں کسی قسم کے علاج و معالجہ کی سہولت فراہم نہیں کی گئی جس کے باعث وہ جاں بحق ہو گئے،جیل انتظامیہ نے مکمل تعصب اور غفلت کا مظاہرہ کیا۔

انہو ں نے کہا کہ وحید شیخ کا قتل کھلا ماورائے عدالت قتل ہے اب تک ایم کیوایم کے 62 کارکنا ن کو ماورائے عدالت قتل کیا جاچکا ہے یہ ایم کیوایم کے خلاف جاری ریاستی آپریشن کا تسلسل ہے جس کی جتنی بھی مذمت کی جائے کم ہے۔

آخرمیں انہوں نے مطالبہ کیا کہ وحید شیخ کے قتل کا مقدمہ جیل انتظامیہ اور رینجرز کے خلاف درج کیاجائے اور شہید کے لواحقین کو انصاف کی فراہمی یقینی بنائی جائے۔

Comments

comments

یہ بھی پڑھیں