The news is by your side.

ویڈیو: ’میں جس رنگ کے کپڑے پہنتا ہوں، آنکھیں بھی اسی رنگ کی ہو جاتی ہیں‘

اللہ جسے چاہے اپنے قدرت کے انوکھے تحائف سے نوازے، جسے چاہے کرشمہ بنا دے۔

ٹوبہ ٹیک سنگھ کے 22 سالہ شہری محمد علی کو خدا نے ایک منفرد اور خوب صورت تحفے سے نوازا ہے، وہ جس رنگ کا لباس پہنتے ہیں، ان کی آنکھیں بھی اسی رنگ میں تبدیل ہو جاتی ہیں۔

لوگ جب یہ سنتے ہیں تو یقین ہی نہیں کر پاتے، لیکن پھر ان کی آنکھوں کا بدلتا رنگ دیکھ کر دنگ رہ جاتے ہیں۔

محمد علی نے بتایا کہ ’میں جس رنگ کے کپڑے پہنتا ہوں، میری آنکھیں بھی اسی رنگ کی ہو جاتی ہیں۔‘ انھوں ںے کہا کہ صرف تین رنگ ایسے ہیں جن کے پہننے سے رنگ تبدیل نہیں ہوتا، باقی ہر رنگ آنکھوں پر اثر انداز ہوتا ہے اور آنکھوں کا رنگ تبدیل ہو جاتا ہے۔

محمد علی نے بتایا کہ سبز رنگ کے تمام شیڈز آنکھوں میں آ جاتے ہیں، اسی طرح نیلے رنگ کے شیڈز والی شرٹ اگر پہن لوں تو وہ بھی صاف طور سے آنکھوں میں آ جاتے ہیں، ان کے علاوہ سفید رنگ ہے جس کی وجہ سے آنکھوں کا رنگ بدل جاتا ہے۔

محمد علی کے مطابق ان کی آنکھوں کا بنیادی رنگ خاکی (گرے) ہے، اور کالا ایسا رنگ ہے جس کا اثر آنکھوں میں خاص محسوس نہیں ہوتا۔ عام لوگ تو کہتے ہیں کہ ہاں تبدیل ہوا ہے رنگ لیکن جب کیمرے سے دیکھتے ہیں تو وہ اس میں پکڑا نہیں جاتا۔

انھوں نے بتایا کہ کالے رنگ کے علاوہ پیلے اور لال رنگ کے شیڈز بھی ان کی آنکھوں میں نہیں آتے۔ ان رنگوں کے علاوہ کچھ شیڈز بالکل صاف طور سے آنکھوں میں آتے ہیں جب کہ کچھ ہلکے آ جاتے ہیں۔

محمد علی نے بتایا کہ جب وہ کسی رنگ کے کپڑے پہنتے ہیں تو پھر 30 سے 35 سیکنڈ کا وقت لگتا ہے آنکھوں کا رنگ تبدیل ہونا شروع ہونے میں، لیکن رنگ مکمل تبدیل ہونے میں 4 سے 5 منٹ لگ جاتے ہیں۔

محمد علی کا کہنا ہے کہ انھیں اس معاملے سے کبھی کوئی مسئلہ نہیں ہوا، اس لیے انھوں نے کبھی ڈاکٹر سے اس سلسلے میں رجوع نہیں کیا۔ انھوں نے کہا کہ گوگل پر اس حوالے سے سرچ کیا لیکن انھوں نے اس خصوصیت کے ساتھ کسی اور کو نہیں دیکھا۔

جب محمد علی نے جاب شروع کی تو لوگ ان سے پوچھنے لگے کہ کیا وہ لینس استعمال کرتے ہیں، لیکن وہ جواب دیتے کہ یہ قدرتی ہے۔ ان کا کہنا ہے کہ وہ بہ طور ماڈل اپنا کیریئر بنانا چاہتے ہیں۔

Comments

یہ بھی پڑھیں