نیویارک : وزیر خزانہ سینٹر محمد اورنگزیب نے ٹیکس نہ دینے والوں پر پابندیاں لگانے کا اعلان کرتے ہوئے کہا اب ہمارے پاس گنجائش نہیں کہ ملک میں کوئی نان فائلر رہے۔
تفصیلات کے مطابق وزیرخزانہ سینٹر محمد اورنگزیب نے نیویارک میں وائس آف امریکا کو انٹرویو میں کہا کہ امریکا کی مدد اور چین کا تعاون آئی ایم ایف پروگرام کی منظوری کی وجہ بنا، نئے قرض پروگرام کی منظوری میں امریکا نے مدد کی اور چین کےتعاون سے ہی پروگرام کاحصول ممکن ہوسکا ہے۔
محمداورنگزیب نے بتایا کہ آئی ایم ایف نےپاکستان کیلئے 7 ارب ڈالر قرض پروگرام کی منظوری دی، آئی ایم ایف قرض پروگرام 37 ماہ پرمشتمل ہے، آئی ایم ایف کا آخری پروگرام کرنا ہے تو معیشت میں بنیادی اصلاحات لانا ہوں گی۔
ان کا کہنا تھا کہ دوست ممالک نے مالیاتی ضرورت کو پورا کرنے کی یقین دہانی کرائی ہے مجموعی ترقی 4 فیصد سے اوپرجاتی ہے تو ترسیلات زرمیں کمی ہو جاتی ہے۔
وزیر خزانہ نے کہا کہ برآمدات میں اضافے کیلئے معاشی ڈھانچےمیں تبدیلیاں ناگزیرہیں، معاشی ڈھانچے میں تبدیلی سے آئندہ 3 سال میں آگے لے کر جا سکیں گے۔
ان کا کہنا تھا کہ حکومت کے پاس اب معاشی اصلاحات کے علاوہ کوئی چارہ نہیں، معاشی اصلاحات کیلئےٹیکس نیٹ سے باہر موجود شعبوں کودائرہ کار میں لانا ہوگا۔
وفاقی وزیر نے بتایا کہ تنخواہ دار اور مینوفیکچرنگ طبقےپراضافی بوجھ کوکم کیاجائےگا اور ریٹیلرز،ہول سیلرز،زراعت اورپراپرٹی شعبوں کوٹیکس نیٹ میں لانا ہوگا۔
انھوں نے کہا کہ محصولات میں29فیصد اضافےکےباوجود ٹیکس ٹوجی ڈی پی کی شرح 9 فیصد رہی لیکن یہ شرح کسی بھی ملک کی معیشت کواستحکام نہیں دلا سکتی۔
سینٹر محمد اورنگزیب نے اعلان کیا کہ حکومت اب نان فائلرکی اصطلاح ختم کرنے جارہی ہے، ٹیکس نہ دینےوالوں پرایسی پابندیاں لگائیں گےکہ وہ بہت سےکام نہیں کرسکیں گے۔
وفاقی وزیر نے بتایا کہ حکومت کے پاس لوگوں کے طرز زندگی کا ڈیٹا موجود ہے، ایف بی آرٹیکس ادا نہ کرنے والوں کو حراست میں لیے بغیرٹیکس نیٹ میں لائے گا ساتھ ہی تنخواہ دار اور مینوفیکچرنگ طبقے پر جو اضافی بوجھ ڈالا گیا تھا اسے کم کیا جائے گا۔
انھوں نے کہا کہ دوست ممالک سے جو قرض لیا ہےاس میں چین کاحجم سب سے زیادہ ہے، امریکا آئی ایم ایف کاسب سےبڑاحصہ دارہے، امید ہے مستقبل میں امریکا پاکستان مزیدسرمایہ کاری کرے گا۔
وزیر خزانہ کا مزید کہنا تھا کہ ایگزیکٹوبورڈ اجلاس میں واشنگٹن کی پاکستان کیلئے قرض پروگرام کی حمایت کوسراہتےہیں ، جی ایس پی پلس پروگرام پاکستانی برآمدات کےلیےلائف لائن کی حیثیت رکھتاہے۔
انھوں نے بتایا کہ آئی ایم ایف پروگرام میں تاخیر نہیں ہوئی، پروگرام مرحلہ وارعمل کے نتیجے میں منظور کیا گیا ہے، ماضی کے پروگراموں پرعمل نہ کرنے کے باعث ساکھ اور اعتماد کا فقدان ہے، لیکن حکومت پرعزم ہے کہ آئی ایم ایف پروگرام کے مطابق معاشی اصلاحات لانی ہیں، گزشتہ مالی سال کے اختتام پر روپے کی قدر میں استحکام آیا ہے، زرمبادلہ کے ذخائر بڑھے ہیں جس کے نتیجے میں مہنگائی میں کمی ہوئی ہے۔
