پنڈی: بیٹنگ کوچ محمد یوسف دوسرے ٹیسٹ کی تیاری کے لئے اتوار کو ملتان پہنچے تھے۔
ذرائع کے مطابق محمد یوسف دو دن سے پنڈی کے ڈریسنگ روم میں موجود نہیں ہیں، وہ ہیڈ کوچ ثقلین مشتاق اور بابر اعظم کی ہدایت پر ملتان پہنچے ہیں۔
چیف سلیکٹر محمد وسیم اور ڈائریکٹر ندیم خان آج ملتان پہنچیں گے، ٹیم انتظامیہ اور پی سی بی حکام کی مشاورت سے چیف کیوریٹر آغا زاہد ملتان ٹیسٹ کی پچ بنائیں گے۔
پنڈی ٹیسٹ میں پچ پر ہونے والی تنقید کے بعد پی سی بی پر کافی دباؤ ہے، ٹیم انتظامیہ اور پی سی بی ایسی پچ بنانا چاہتے ہیں جس پر پاکستانی بولروں کو ایڈوانٹیج ملے۔
واضح رہے کہ شاہد آفریدی نے پچ کے حوالے سے چیئرمین پی سی بی کو تنقید کا نشانہ بناتے ہوئے کہا تھا کہ راولپنڈی کی پچ ہمیشہ سے فاسٹ بولرز کے لیے سازگار رہی ہے، پی سی بی نے پچ کے ساتھ چھیڑ چھاڑکیوں کی؟ ہمیں اب یہ ٹیسٹ ہارنے کا خوف ہے اور ہم جیتنا بھی چاہتے ہیں لیکن ہمیں تکنیک معلوم ہی نہیں ہے۔
سابق ٹیسٹ کرکٹر فاسٹ بولر عاقب جاوید نے چیئرمین پی سی بی رمیز راجہ پر تنقید کرتے ہوئے کہا کہ اگر ہم سے پچ نہیں بنتی تو کس سے بنتی ہے؟ ہم جب تک پچز کا ایک انسٹی ٹیوٹ نہیں بنائیں گے اور کیوریٹر کو پتا نہیں ہوگا کہ پچ بنتی کیسی ہے؟ سری لنکا میں ٹرننگ پچز بنتی ہیں وہاں سے بندہ لایا جاسکتا ہے۔
