اسلام آباد : ترجمان پاک فوج نے تصدیق کی ہے کہ مسلم لیگ ن کے رہنما اور سابق گورنر سندھ محمد زبیر نے آرمی چیف سے دو ملاقاتیں کیں جن میں نواز شریف اور مریم نواز سے متعلق گفتگو کی۔
ان خیالات کا اظہار پاک فوج کے شعبہ تعلقات عامہ کے ڈائریکٹر جنرل میجر جنرل بابر افتخار نے اے آر وائی نیوز کے پروگرام پاور پلے میں گفتگو کرتے ہوئے کیا، انہوں نے کہا کہ آرمی چیف سے ہونے والی ملاقاتیں سابق گورنر سندھ محمد زبیر کی درخواست پر ہوئیں۔
میجر جنرل بابر افتخار نے مسلم لیگ نواز کے رہنماوں کی آرمی چیف سے ملاقاتوں کی تصدیق کرتے ہوئے کہا کہ دونوں ملاقاتیں سابق وزیر اعظم نواز شریف اور مریم نواز سے متعلق تھیں۔
ڈی جی آئی ایس پی آر نے بتایا کہ آرمی چیف نے محمد زبیر پر واضح کیا کہ قانونی مسائل عدالتوں اور سیاسی مسائل پارلیمنٹ میں حل ہوں گے، آرمی چیف اور محمد زبیر کی ملاقات میں ڈائریکٹر جنرل آئی ایس آئی بھی موجود تھے۔
ترجمان پاک فوج کا کہنا تھا کہ محمد زبیر کی پہلی ملاقات اگست کے آخری ہفتے میں جبکہ دوسری ملاقات 7 ستمبرکو ہوئی تھی۔
خیال رہے کہ آج صبح پاکستان مسلم لیگ کی رہنما مریم نواز نے کسی بھی لیگی رہنما کی آرمی چیف سے ملاقات کی تردید کی تھی۔
ترجمان پاک فوج کا کرونا وائرس اور پولیو سے متعلق بڑا اعلان
ترجمان پاک فوج میجر جنرل بابر افتخار نے کہا ہے کہ پاکستان پولیو پروگرام کے تحت 2021 تک پاکستان کو پولیو فری بنادیں گے۔
ڈائریکٹر آئی ایس پی آر جنرل میجر جنرل بابر افتخار کا کہنا تھا کہ آرمی چیف نے آج ایک انسداد پولیو مہم میں شرکت کی، کرونا کی وجہ سے انسداد پولیس مہم تعطل کا شکار تھی۔
ان کا کہنا تھا کہ ہماری تیاری صلاحیت کے مطابق ہے، پاک فوج ہر طرح کے خطرے سے نمٹنے کےلیے تیار ہے، کل آرمی چیف نے ایک نئے ٹینک کا مظاہرہ بھی دیکھا۔
