اسلام آباد : جے یو آئی نظریاتی کے مرکزی نائب امیر بلوچستان عبدالقادرلونی نے کہا ہے کہ مولانا فضل الرحمان ایک اجرتی سیاست دان ہیں، پی ڈی ایم منصوبہ بندی کے تحت ملک کے خلاف سرگرم عمل ہے۔

اسلام آباد میں پریس کانفرنس سے خطاب کرتے ہوئے جے یو آئی نظریاتی کے مرکزی رہنما عبدالقادر لونی کا کہنا تھا کہ مولانا فضل الرحمان حصول اقتدار کی جنگ لڑ رہے ہیں اور این آر او دلانے کے لیے وکیل بن چکے ہیں۔

مولاناعبدالقادرلونی نے کہا کہ پی ڈی ایم منصوبہ بندی کے تحت ملک کے خلاف سرگرم عمل ہے، پی ڈی ایم میں شامل جماعتیں استعفوں کے معاملے پر تقسیم ہیں یہ محض مفاد پرستوں کا ٹولہ ہے۔

جے یو آئی نظریاتی کے رہنما نے مولانا فضل الرحمان پر کڑی تنقید کی اور کہا کہ مولانا فضل الرحمان نے پختونوں کو برا کہا، وہ اقتدار کے لیے گالیوں تک اتر آئے، مولانا صرف پانی کا بلبلہ ہیں اس سے زیادہ نہیں۔

عبدالقادرلونی کا مزید کہنا تھا کہ جماعت سے جن 4لوگوں کو نکالا گیا وہ ہمارے ساتھ رابطے میں ہیں، مولانا فضل الرحمان موروثی سیاست کررہے ہیں، انہوں نے اپنے بیٹے کو قومی اسمبلی میں پارلیمانی لیڈر اور بھائی کو سینیٹر بنوایا۔