The news is by your side.

ہماری روایتی حکومت نہیں، ہم کچھ کرکے دکھائیں گے، جہانگیر ترین

ملتان: پی ٹی آئی کے رہنما جہانگیر ترین نے کہا ہے کہ پی ٹی آئی کا ایک منشور ہے ایک ویژن ہے، ہماری روایتی حکومت نہیں ہم کچھ کرکے دکھائیں گے۔

تفصیلات کے مطابق پاکستان تحریک انصاف کے رہنما جہانگیر ترین نے اجتماعی شادیوں کی تقریب سے خطاب کرتے ہوئے کہا کہ پی ٹی آئی کا ایک منشور ہے ایک ویژن ہے جو پی ٹی آئی کے منشور کے ساتھ نہیں انہیں عوام نے ووٹ نہیں دیا۔

جہانگیر ترین نے کہا کہ اب لوگوں کو قرض نہیں کاروبار کے لیے گرانٹ ملے گی، یکم جولائی تک جنوبی پنجاب سیکریٹریٹ بن جائے گا، جنوبی پنجاب کے فیصلے اب یہیں ہوں گے، جنوبی صوبہ بننے میں وقت لگے گا بہت پیچیدگیاں ہیں۔

انہوں نے کہا کہ غریبوں کے لیے صرف عمران خان نے سوچا ہے، عمران خان 2019 میں جنوبی پنجاب کے عوام کو تحفہ دیں گے، جنوبی پنجاب میں میں سیکریٹریٹ کا کام تاریخی ہوگا۔

مزید پڑھیں: حکومت میں نہ کوئی عہدہ رکھ سکتاہوں اورنہ ہی رکھناچاہتا ہوں،جہانگیرترین

جہانگیرترین کا کہنا تھا کہ وزیراعظم کے فیصلے کی مکمل حمایت کرتا ہوں، ملتان جنوبی پنجاب کا سب سے بڑا اور مرکزی شہر ہے، جنوبی پنجاب کے لوگوں کی ملتان تک رسائی بہاولپور کی نسبت آسان ہے۔

یاد رہے اگست میں ہونے والے وفاقی کابینہ اجلاس میں جنوبی پنجاب صوبے کے قیام کے لیے بھی کمیٹی بنائی گئی تھی ، جس میں وزیرِ خارجہ شاہ محمود قریشی اور خسرو بختیار شامل تھے۔

خیال رہے تحریک انصاف نے حکومت کے ابتدائی 100 روز کے ایجنڈے کا اعلان کیا تھا، جس کو جنوبی پنجاب صوبہ محاذ تحریک کے سربراہ نے انقلابی اقدام قرار دیتے ہوئے کہا تھا کہ عمران خان ملک و قوم کی تقدیر بدلنے کا ایجنڈا لے کر آئے۔

Comments

یہ بھی پڑھیں