The news is by your side.

Advertisement

اسلام آباد یونائیٹڈ نے سلطانز کو شکست دے کر اگلے مرحلے کے لیے کوالیفائی کرلیا

شارجہ: پاکستان سپر لیگ کے پچیسویں‌ میچ میں اسلام آباد یونائیٹڈ نے ملتان سلطانز کو 33 رنز سے شکست دے کر اگلے مرحلے تک رسائی حاصل کرلی، مصباح الیون 12 پوائنٹس کے ساتھ پوائٹس ٹیبل پر سرفہرست ہے۔

تفصیلات کے مطابق پاکستان سپرلیگ کے 25ویں میچ میں ملتان سلطانز اور دفاعی چیمپئن اسلام آباد یونائیٹڈ کی ٹیمیں مد مقابل تھیں، سلطانز کی قیادت شعیب ملک اور یونائیٹڈ کی کپتانی مصباح الحق نے کی۔

ملتان سلطانز کے کپتان شعیب ملک نے ٹاس جیت اسلام آباد یونائیٹڈ‌ کو پہلے بیٹنگ کی دعوت دی تو مصباح الیون کی جانب سے اوپننگ کے لیے لک رونچی اور جے پی ڈومینی میدان میں آئے، یونائیٹڈ کی ٹیم کو پہلا نقصان 46 پر ہوابعد ازاں 91 ، 126، 164 کے مجموعی اسکور پر گریں۔

اسلام آباد کی جانب سے لک رونچی 58 رنز بناکر پہلے نمبر پر رہے جبکہ ایلکس ہیلز نے 46 رنز کی اننگز کھیلی، عمر گل 2 اور عمران طاہر ایک وکٹ لینے میں کامیاب رہے۔

ہدف کے تعاقب میں سلطانز نے بیٹنگ کا آغاز کیا تو دو کے مجموعی اسکو پر ٹیم کی دو وکٹیں گر گئیں تھیں، بعد ازاں 20 کے مجموعی اسکور پر احمد شہزاد اور صہیب مقصود بھی آؤٹ ہوئے، شعیب ملک وکٹ پر زیادہ دیر وکٹ پر رک نہ سکے اور انہیں شاداب خان نے کلین بولڈ کر کے پویلین کی راہ دکھائی۔

سلطانز کی جانب سے پولارڈ نے ذمہ دارانہ بیٹنگ کرتے ہوئے 47 گیندوں پر 6 چھکوں اور 5 چوکوں کی مدد سے 73 رنز بنائے اور نمایاں بلے باز رہے جبکہ سمیت پٹیل، فہیم اشرف، شاداب خان اور عماد بٹ نے دو دو وکٹیں لیں جبکہ محمد سمیع ایک کھلاڑی کو آؤٹ کرسکے۔

ملتان سلطانز اننگز

اٹھارویں اوور کی چوتھی گیند پر پولارڈ آؤٹ ہوئے تو سلطانز کی فتح ہاتھ سے نکل گئی، انیسویں اووور کی آخری اور بیسویں کی پہلی گیند پر ہی اگلے دو کھلاڑی آؤٹ ہوئے یوں پوری ٹیم 152 کے مجموعی اسکور پر پویلین لوٹی۔

چودہویں اوور کی آخری گیند پر وایٹلی آؤٹ ہوئے، 15ویں اوور کے اختتام پر ٹیم کا مجموعی اسکور 6 وکٹوں کے نقصان پر 105 تک پہنچا۔

نویں اوور میں شاداب خان نے سلطانز کے کپتان شعیب ملک کو کلین بولڈ کر کے پویلین کی راہ دکھائی، دسویں اوور کے اختتام پر ٹیم کا مجموعی اسکور پانچ وکٹوں کے نقصان پر 50 رنز تک پہنچا۔

ہدف کے تعاقب میں ملتان سلطانز کی جانب سے اننگز کا آغاز کمار سنگاکارا اور احمد شہزاد نے کیا تاہم ملک الیون کو ابتدائی دو کھلاڑی صرف دو کے مجموعی اسکور پر ہی واپس لوٹ گئے، پانچویں اوور کے اختتام پر ملتان سلطانز نے چار کھلاڑیوں کے نقصان پر صرف 20 رنز بنائے۔

اسلام آباد یونائیٹڈ اننگز

انیسویں اوور کی دوسری گیند پر یونائیٹڈ کے حسین طلعت 36 رنز کی اننگز کھیل کر آؤٹ ہوئے، مقررہ اوور ختم ہونے پر مصباح الیون نے چار وکٹوں کے نقصان پر 185 رنز بنائے۔

گیارہویں اوور کی آخری گیند پر عمران طاہر نے لک رونچی کو کلین بولڈ کیا، انہوں نے 36 گیندوں پر 58 رنز کی شاندار اننگز کھیلی، بعد ازاں پندرہویں اوور کی تیسری بال پر ایلکس ہیلز آؤٹ ہوئے، اوور اختتام پر ٹیم کا مجموعی اسکور تین وکٹوں کے نقصان پر 126 تک پہنچا۔

ڈومینی کے آؤٹ ہونے کے بعد ایلکس ہلز اوپنر کا ساتھ دینے کے لیے کریز پر پہنچے، لک رونچی نے اننگز کے نویں اوور میں تین چھکوں اور 6 چوکوں کی مدد سے نصف سنچری مکمل کی، دسویں اوور کے اختتام پر ٹیم کا مجموعی اسکور 1 وکٹ کے نقصان پر 87 تک پہنچا۔

اسلام آباد کی جانب سے بیٹنگ کا آغاز لک رونچی اور جے پی ڈمینی نے کیا، پانچویں اوور کی آخری گیند پر مصباح الیون کو 46 کے مجموعی اسکور پہلی وکٹ کے نقصان کا سامنا کرنا پڑا۔

ٹاس کے بعد گفتگو کرتے ہوئے سلطانز کے کپتان کا کہنا تھا کہ ہم پہلے باؤلنگ کرتے ہوئے مخالف ٹیم کو کم سے کم ہدف تک محدود رکھنے کی کوشش کریں گے، گزشتہ میچز میں ٹیم کی بیٹنگ لائن اچھی کارکردگی کا مظاہرہ نہیں کرسکی مگر آج فتح حاصل کرنے کے لیے ہم سرتوڑ کوشش کریں گے۔

یونائیٹڈ کے کپتان مصباح الحق کا کہنا تھا کہ پچ بیٹنگ کے لیے سازگار ہے اس لیے پوری کوشش ہوگی کہ سلطانز کو جیت کے لیے 160 سے زیادہ کا ہدف دیں۔

اسلام آباد یونائیٹڈ کو اگلے مرحلے تک پہنچنے کے لیے آج کا میچ جیتنا لازم ہے تاہم اُن کے اہم کھلاڑی رومان رئیس انجری کے باعث اسکواڈ کا حصہ نہیں بن سکے۔

دونوں ٹیموں نے اسکواڈ میں دو دو تبدیلیاں کی ہیں، اسلام آباد یونائیٹڈ نے ایلکس ہیلز اور عماد بٹ کو ٹیم کا حصہ بنایا جبکہ سلطانز نے روس وائٹلی اور عمر گل کو موقع فراہم کیا۔

خیال رہے کہ اگلے مرحلے میں چھ میں سے چار ٹیمیں کوالیفائی کریں گی، لاہور قلندرز مسلسل شکست کے باعث ایونٹ سے پہلے ہی باہر ہوچکی، پوائنٹس ٹیبل پر پانچویں پوزیشن حاصل کرنے والی ٹیم بھی اگلے مرحلے تک رسائی حاصل نہیں کرسکے گی۔

ملتان کی ٹیم نے اب تک 9 میچ کھیلے جن میں سے انہیں 4 میں فتح چار میں شکست ہوئی جبکہ ایک میچ بارش کی نذر ہوگیا تھا، ملک الیون آج اپنا آخری اور دسواں میچ کھیل رہی ہے، شکست کی صورت میں پشاور زلمی پوائنٹس کے حساب سے اوپر آجائے گی کیونکہ اُس کے ابھی 2 میچز مزید باقی ہیں۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Print Friendly, PDF & Email

Comments

comments

یہ بھی پڑھیں