ممبئی : بھارت کی مشہور درگاہ حاجی علی میں خواتین کے داخلے پر پابندی چارسال بعد ختم کردی گئی، حاجی علی درگاہ کے ٹرسٹ نے خواتین پر اس درگاہ کے اندرونی مزار میں داخلے پر پابندی عائد کر رکھی تھی۔
تفصیلات کے مطابق ممبئی میں خواتین کا ایک گروپ حاجی علی درگاہ کے اندرونی مزار میں چار سال بعد داخل ہو گیا، خواتین پر داخلے سے متعلق پابندی کیس میں ممبئی ہائی کورٹ نے اگست میں اپنے ایک فیصلے میں کہا تھا کہ ‘یہ فیصلہ آئین کی خلاف ورزی’ اور خواتین کے ساتھ امتیازی سلوک تھا۔
حاجی علی درگارہ ٹرسٹ نے پہلے ممبئی ہائی کورٹ کے اس فیصلے کو سپریم کورٹ میں چیلنج کیا تھا تاہم گذشتہ ماہ اس پابندی کو ختم کرنے پر اتفاق کیا تھا۔
بھارت میں حالیہ مہینوں کے دوران خواتین کو مذہبی مزارات پر جانے کی اجازت دینے کے لیے متعدد مہمات شروع کی گئی ہیں۔
واضح رہے کہ سنہ 2011 میں عورتوں کو مزار کے اندر جانے کی اجازت تھی لیکن بعد میں ٹرسٹ نے اس پر پابندی عائد کر دی تھی۔
برطانوی نشریاتی ادارے بی بی سی کے مطابق ٹرسٹ کا مؤقف تھا کہ خواتین کو صوفی مردوں کے مزاروں کو چھونے کی اجازت دینا ‘گناہ’ ہے۔
اس حوالے سے مسلمان خواتین کے لیے سرگرم ایک تنظیم مسلم مہیلا آندولن (بی ایم ایم اے) نے بی بی سی کو بتایا کہ 100خواتین پر مشتمل ایک گروپ منگل کو معروف درگاہ حاجی علی میں داخل ہو گیا۔
بی ایم ایم اے نے 15 ویں صدی میں قائم ہونے والی اس درگاہ پر خواتین کے داخلے پر پابندی کو چیلنج کر رکھا تھا۔
