ممبئی: بھارتی شہر ممبئی کی رہائشی عمارت میں لگنے والی خوفناک آگ نے 7 افراد کو جلاڈالا ہے۔
بھارتی میڈیا رپورٹ کے مطابق ممبئی کے علاقے تردیو میں واقع 20 منزلہ عمارت میں اچانک آگ بھڑک اٹھی، آگ بلڈنگ کی 18 ویں منزل پر لگی، جس کے نتیجے میں 7 افراد جھلس گئے جبکہ 15 سے زائد زخمی ہوئے، زخمیوں میں سے تین کی حالت نازک بتائی جاتی ہے جنہیں قریبی اسپتالوں میں طبی امداد دی جارہی ہے۔
واقعے کی اطلاع ملنے پر ریسکیو کی 10 گاڑیوں نے امدادی کارروائیوں کا آغاز کیا ، آگ کی شدت کو مدنظر رکھتے ہوئے فائربریگیڈ نے اسے تیسرے درجے کی آگ قرار دیتے ہوئے مزید فائڑ ٹینڈر طلب کئے جنہوں نے سخت جدوجہد کے بعد آگ پر قابو پالیا، اس وقت کولنگ کا عمل جاری ہے۔
بھارتی میڈیا رپورٹ کے مطابق اٹھارویں منزل پر لگی آگ کے باعث پوری عمارت میں سخت خوف وہراس پھیلا اور رہائشی دیوانہ وار محفوظ مقام کی جانب بھاگنے لگے، جس کے باعث افراتفری کا ماحول پیدا ہوا۔
