The news is by your side.

Advertisement

مراد سعید کا شہباز شریف سے پارلیمان میں صفائی پیش کرنے کا مطالبہ

اسلام آباد : وفاقی وزیر مواصلات مرادسعید نے شہبازشریف سےپارلیمان میں صفائی پیش کرنے کا مطالبہ کرتے ہوئے کہا پارلیمان میں آئیں پوچھے گئے18 سوالوں کاجواب دیں ، قوم جواب کی منتظر ہے۔

تفصیلات کے مطابق وفاقی وزیر مواصلات مرادسعید نے اپوزیشن لیڈر سے پارلیمان میں صفائی پیش کرنےکامطالبہ کرتے ہوئے کہا ان کی کرپشن پاناما لیکس ٹو ہے، بڑے کے بعد چھوٹے بھائی کی کرپشن کی داستان سامنے آئی ہے۔

،مرادسعید کا کہنا تھا کہ بیرسٹر شہزاد اکبر نے شہباز شریف سے 18 سوال پوچھے ہیں، پوری قوم شہبازشریف کی جانب سے جواب کی منتظر ہے، پارلیمان میں آئیں پوچھے گئے 18سوالوں کا جواب دیں۔

وفاقی وزیر مواصلات نے مزید کہا کہ  شہبازشریف کہتےہیں پارلیمان کومضبوط بنایاجائے، ہم معاملے کو ایوان میں لے جانے کیلئے تیار ہیں، بڑے بھائی کی طرح چھوٹے بھائی کو بھی موقع دیتے ہیں، شہباز شریف نے بھی پارلیمان میں جھوٹ بولا تو ذمہ دار خود ہوں گے۔

ان کا کہنا تھا کہ یہ خیال ہے کہ قوم بھول جائے گی تو یاد رکھیں بھولنے نہیں دیں گے ، امید ہے خواجہ آصف بھی آپ کو بھولنے کا مشورہ نہیں دیں گے، شہباز شریف قومی اسمبلی تشریف لائیں، قوم جواب کی منتظر ہے۔

مزید پڑھیں : شہزاداکبر نےشہبازشریف کے سامنے اٹھارہ سوالات رکھ دیئے

گذشتہ روز وزیراعظم کے معاون خصوصی برائے احتساب شہزاد اکبر نے کہا تھا  کہ شہبازشریف کی کرپشن دھیلے کی نہیں،اربوں کی ہے، شریف  خاندان نے جعلی ٹی ٹیوں کے ذریعے پیسہ باہر بھجوایا، شہبازشریف کے اثاثوں میں سترفیصد اور سلمان شہباز کے اثاثوں میں آٹھ ہزار گنا اضافہ ہوا۔

شہزاداکبر نےشہبازشریف کے سامنے اٹھارہ سوالات رکھتے ہوئے کہا تھا کہ ٹی ٹی نظام پوشیدہ نہیں،باہر سے پیسہ لانے کا ایک قانون بنایا گیا تھا، شریف خاندان نے جعلی ٹی ٹی کی رقم سے 32 سے 33 کاغذی  کمپنیاں بنائیں، معصوم لوگوں کا نام استعمال کرکے ٹی ٹی اکاؤنٹس میں ڈالی گئیں، کاغذی کمپنیوں کا کنٹرول روم شہبازشریف دور میں وزیراعلیٰ سیکریٹریٹ تھا۔

Comments

یہ بھی پڑھیں