The news is by your side.

Advertisement

فرزند زرداری نے نہیں بتایا کہ ایان علی کے ٹکٹ کے پیسے کس نے دیئے؟ مراد سعید

اسلام آباد : وفاقی وزیر برائے مواصلات مراد سعید نے بلاول بھٹو کے خطاب پر ردِ عمل ظاہر کرتے ہوئے کہا ہے کہ جانشین زرداری نے نہیں بتایا کہ ایان علی کے ٹکٹ کے پیسے کیسے ادا ہوتے رہے؟

یہ بات انہوں نے سماجی رابطے کی ویب سائٹ ٹوئٹر پر اپنے پیغام میں کہی۔ مراد سعید نے کہا کہ حادثاتی سیاستدان نے اپنی تقریر میں سندھ میں کتوں کے کاٹنے سے اموات کا ذکر نہیں کیا اور بھوک سے مرنے والے سیکڑوں بچوں کی بات بھی نہیں کی۔

انہوں نے کہا کہ جانشین زرداری وزیراعلیٰ سندھ کے حلقے میں ایمبولینس نہ ہونے پر خاموش رہے اور کراچی میں بارشوں سے ہونے والی اموات پر بھی کچھ نہ کہا، فرزند زرداری نے یہ انکشاف کیا بارش آتا ہے تو پانی آتا ہے اور زیادہ بارش آتا ہے تو زیادہ پانی آتا ہے۔

وفاقی وزیر کا کہنا تھا کہ بلاول زرداری جانتے ہیں سندھ کا پیسہ فیکٹ اکاؤنٹ میں استعمال ہورہا ہے، جانشین زرداری نے نہیں بتایا کہ ایان علی کے ٹکٹ کے پیسے کیسے ادا ہوتے رہے۔

انہوں نے کہا کہ اب عمران خان آیا ہے توکراچی کے ترقیاتی منصوبوں کی منظوری دے دی گئی، عمران خان نے پاکستان کو سفارتی تنہائی سے عالم اسلام کی رہنمائی دلوائی ہے۔

مراد سعید نے کہا کہ حکومت نے بلاول کے ابو اور چچا نواز کے قرضوں پر سود کی مد میں10ارب ڈالر واپس کئے ہیں۔ عمران خان نے آئی سی یو میں پڑی معیشت کو درست سمت دی ہے۔

عمران خان نے پاکستان کو کاروبار کی آسانی میں 28 درجے ترقی دلوائی ہے، عمران خان کی وجہ سے ملک میں سرمایہ کاری آنے لگی ہے، فرزند زرداری کو سیاسی بقا کیلئے مولوی کے کنٹینر تک آنا پڑا۔

Comments

یہ بھی پڑھیں