The news is by your side.

Advertisement

مرید عباس قتل کیس : سپریم کورٹ نے عادل زمان کی ضمانت کالعدم قرار دے دی

کراچی : سپریم کورٹ کراچی رجسٹری نے مرید عباس قتل کیس کے مرکزی ملزم عادل زمان کی ضمانت منسوخی سے متعلق فیصلہ جاری کردیا، عدالت نے ملزم کی ضمانت کا حکم کالعدم قرار دے دیا۔

تفصیلات کے مطابق سپریم کورٹ کراچی رجسٹری میں مرید عباس قتل کیس کا فیصلہ سنا دیا گیا، سپریم کورٹ نے اپنے فیصلے میں کہا کہ عینی شاہدین عمر ریحان اور اسامہ کے مطابق عادل زمان موقع پر موجود تھا۔

فیصلے میں کہا گیا ہے کہ عادل زمان خضرحیات اور مرید کے قتل کے وقت عاطف زمان کے ساتھ تھا، ملزم کو گواہوں نے شناخت پریڈ کے دوران شناخت بھی کرلیا تھا، دستاویز سے ثابت ہوتا ہے کہ واردات میں اسلحہ بھی عادل زمان کا استعمال ہوا۔

سپریم کورٹ کے مطابق شواہد عادل زمان کو عاطف زمان کا شریک ملزم ثابت کرنے کیلئے کافی ہیں، ضمانت پر رہائی کا ناجائز استعمال اور ٹھوس شواہد ہونا الگ الگ معاملہ ہے، عادل زمان کے خلاف تسلیم شدہ حقائق بیان کئے گیے۔

فیصلے میں کہا گیا ہے کہ سندھ ہائی کورٹ کی آبزرویشن دستیاب شواہد سے مطابقت نہیں رکھتی، ہائیکورٹ نے ضمانت دیتے ہوئے اہم شواہد اورحقائق کو نظر انداز کیا، ہائیکورٹ کی جانب سے عادل زمان کی ضمانت کا حکم کالعدم قرار دیا جاتا ہے، سپریم کورٹ نے ہدایت کی ہے کہ ٹرائل کورٹ آزادانہ ٹرائل کرکے کیس کا فیصلہ سنائے۔

مزید پڑھیں : مرید عباس کیس ، ضمانت خارج ہونے پر عادل زمان عدالت سے فرار

واضح رہے کہ اینکر مرید عباس قتل کیس میں ضمانت خارج ہونے ملزم عادل زمان عدالت سے فرار ہوگیا تھا، جس پر سپریم کورٹ نے ملزم کو گرفتار کرکے واپس جیل بھیجنے کا حکم دیا۔

خیال رہے اہلیہ زارا عباس نے اپنے شوہر کے قاتلوں سے صلح کرنے سے انکار کرتے ہوئے  کہا تھا مریدعباس کے قتل کاہرگز سودا نہیں کرسکتی، کیس جتنا بھی طویل چلے مکمل طور پر پیروی کروں گی۔

Comments

یہ بھی پڑھیں