The news is by your side.

Advertisement

جناح اسپتال میں روزانہ 100 کورونا ٹیسٹ کیے جائیں گے، مرتضیٰ وہاب

کراچی : ترجمان سندھ حکومت بیرسٹر مرتضیٰ وہاب نے کہا ہے کہ جناح اسپتال کی بائیوسیفٹی لیبارٹری میں یومیہ100کورونا ٹیسٹ ہونگے، گلگت بلتستان کے طلبہ کو کورونا ٹیسٹ منفی آنے کے بعد واپس جانے کی اجازت ہوگی۔

یہ بات انہوں نے سماجی رابطے کی ویب سائٹ ٹوئٹر پر اپنے پیغام میں کہی، انہوں نے کہا کہ سندھ حکومت نے جناح اسپتال انتظامیہ کی درخواست منظور کرلی ہے جس کے تحت جناح اسپتال میں پہلی بائیو سیفٹی لیول تھری لیب قائم کردی گئی ہے.

انہوں نے کہا کہ جناح اسپتال میں قائم بائیو سیفٹی لیبارٹری نے باقاعدہ کام شروع کردیا ہے، اس لیبارٹری میں کورونا وائرس کی تشخیص کیلئے یومیہ سو ٹیسٹ ہونگے، اگلے مرحلے میں کورونا ٹیسٹ کی استعداد بڑھائی جائے گی۔

مرتضیٰ وہاب کا کہنا تھا کہ جناح اسپتال انتظامیہ کی درخواست پر وزیراعلیٰ نے فنڈز مختص کرکے لیب کے قیام کی منظوری دی تھی، ثابت ہوگیا کہ پی ٹی آئی کے نمائندے کھوکھلے دعوے کرتے ہیں کیونکہ سندھ حکومت ڈیلیور کرتی ہے، ہم عوامی خدمت پریقین رکھتےاور عمل کرتے ہیں۔

گلگت بلتستان کے طلبہ کی مشروط واپسی کا فیصلہ 

علاوہ ازیں سندھ میں مقیم گلگت بلتستان کے طلبہ کی فریاد سن لی گئی، سندھ حکومت نے گلگت بلتستان واہس جانے کے خواہشمند طلبہ کو این او سی دینے کا فیصلہ کرلیا۔

اس حوالے سے ترجمان سندھ حکومت بیرسٹر مرتضیٰ وہاب نے کہا ہے کہ 2570طلبہ کی واپسی سے پہلے ان کے کورونا ٹیسٹ کیے جائیں گے، سندھ کے مختلف تعلیمی اداروں میں گلگت بلتستان کے طلبہ زیرتعلیم ہیں۔

ترجمان سندھ حکومت کا مزید کہنا تھا کہ جو طلبہ واپس جانا چاہتےہیں انہیں این او سی دیا جائے گا، گلگت بلتستان کے طلبہ کے کورونا ٹیسٹ کی رپورٹ منفی آنے پر واپس جانے کی اجازت ہوگی۔

Comments

یہ بھی پڑھیں